DONAIRE PAKYAS

Gipildi sa batan-ong Frampton sa world title eliminator

Pakyas si Nonito Donaire sa iyang kampanya nga makabalik og away alang sa world title fight human kini mapildi ni Carl Frampton sa ilang away alang sa World Boxing Organization (WBO) Interim World Featherweight title kagahapon didto sa SSE Arena sa Belfast.

Ang Belfast boxer nga Frampton maoy mikontrolar sa sayong bahin sa away ug naka-sugakod kini sa mga solidong uppercuts ni Donaire una pa niya maangkon ang yango sa tulo ka mga judges kinsa mitali pabor kaniya, 117-111.

Manghod og upat ka tuig ni Donaire, si Frampton sa sayong mga rounds ang mipakita gilayon sa iyang kaagresibo nga maoy iyang gihimong iwag ngadto sa iyang kadaugan bisan pa man ug nakapanghulga kaniya si Donaire sa uwahing mga round.

Mas hanas ug masaligon si Frampton ning awaya kon itandi niadtong pagpakigsangka niya ni Horacio Garcia sa iyang comeback fight sa niaging Nobiyembre.

Sa kadaugan, nakuha ni Frampton ang katungod nga moaway alang sa world title fight sa Windsor Park.

Ang kapildihan maoy ikaduhang sunodsunod nga naangkon ni Donaire sa iyang uwahing tulo ka away. Human mapildi ni Jessie Magdaleno niadtong Nobiyembre 2016 sa unanimous decision, si Donaire midaog batok ni Ruben Garcia Hernandez sa niaging tuig.

“I didn’t have to get involved in a fight there. As you saw in the 11th round, Nonito Donaire is dangerous but I survived the round, stuck to the game plan. At times, my boxing was beautiful. There’s only one thing on my mind - Windsor Park. I can’t wait to get there.”

“Everyone knows how excited I am. I can’t wait. There’s not a man on this planet at featherweight that’s going to beat me at Windsor Park. He was a sharp puncher throughout. The 11th round definitely hurt but I survived it and that’s what champions do,” matod ni Frampton kinsa naghinamhinam na karon nga makaaway alang sa world title.