PORTLAND GISERUHAN
Wa padag-a sa New Orleans, 4-0, sa playoffs
Tagsatagsang gipugnit nila ni Anthony Davis ug Jrue Holiday ang ilang pinakataas nga score sa playoffs sa dihang giharos sa New Orleans Pelicans ang Portland Trail Blazers, 131-123, sa Game 4 sa ilang first round playoff sa Western playoffs sa National Basketball Association (NBA) didto sa Smoothier King Center kagahapon.
Si Davis mipaulbo og 47 puntos samtang si Holiday mipakli og 41 ug ang Pelicans mipugnit sa impresibong 4-0 nga pagkapupos sa unang
team sa playoffs nga unang nakasulod sa second round. Si Rajon Rondo mipakatap og 16 ka assists gawas sa iyang siete puntos ug pito ka rebounds alang sa New Orleans.
Sa pildirong Trail Blazers, si CJ McCollum mipabuto og 38 puntos, Al-Farouq Aminu midugang og 27.
Sa laing duwa, si Minnesota Timberwolves All-Stars Jimmy Butler ug Karl-Anthony Towns miluwas sa kakuyaw ug mipahagsa sa bisitang Houston Rockets 121-105 atol usab sa ilang Game 3 sa Playoffs sulod sa Target Center. Si Butler nangulo sa kadaugan pinaagi sa iyang 28 puntos uban sa pito ka rebounds samtang si Towns gikan sa ngil-ad nga performance sa Game 1 and 2 karon nibulsa’g 18 puntos diin gibuwakan sa 16 rebounds ug 3 assists.
Ang playmaker sa Wolves nga si Jeff Teague nitampo’g 23 puntos uban sa 8 assists, si Andrew Wiggins nidonar sab sa 20 puntos, 5 rebounds ug 5 assists.
Ang Timberwolves nabiyaan sa opening quarter 28-27 pabor sa Rockets apan nailog sa Wolves ang manobela sa 2nd
period 52-51 gumikan sa 10 puntos nga namugna ni one time NBA MVP Derrick Rose sulod lamang sa 2nd quarter.
Sa kinatibuk-an si Rose nakasuik sa 17 puntos, ug iyang napukaw ang pugdol ug nahikatulog nga opensa sa Timberwolves.
Si Houston Rockets superstar ug leading MVP Candidate James Harden nga nakakuha’g 44 puntos sa Game 1, igo lang nitampo’g 29 puntos pero nikagar iyang mga tira sa perimeter samtang si Chris Paul nakamaniho’g 17 puntos apan na fouled 3:23 sa 4th period.
Ang 18,978 Hometown
fans sa Wolves wala mibiya sa arena hangtod wala mitingog ang final buzzer sa paniguro nga modaug gyud ang Wolves nga 14 na ka tuig nga wala makasulod sa NBA Playoffs sukad niadtong 2004.
Bisan sa kapildihan sa Rockets pabiling nag-una sila sa
standing 2-1 (win-loss). Ang Game 4 pagaduwaon gihapon sa Target Center ugma.
Samtang mitikang paduol ngadto sa sunod round ang Philadelphia Sixers pinaagi sa pagpawong sa kainit sa Miami Heat, 106-102, alang sa 3-1 nga bintaha sa ilang series.
Nagkinahanglan na lang og usa ka daog ang Sixers aron makahulbot og lingkuranan alang sa sunod round. Nameligro ang Oklahoma City Thunder human kini gipahilom sa Utah Jazz, 115-102.
Ang Jazz mao na karon ang naglabaw sa ilang serya, 2-1.