CYBERPORN ‘ANGAY HIMUONG ISYU SA ELEKSYON’
Giangkon sa Provincial Women’s Commission nga wa gihapon moundang ang pipila ka mga tawo nga nagnegosyo og cyber pornography sa lungsod sa Cordova, Cebu.
Apan giklaro ni Bise Gob. Agnes Magpale nga wa kini magpasabot nga “pakyas” ang kampanya sa gobyerno batok sa maong illegal nga patigayon.
Gihangop ni Magpale ang pagka-luwas sa tulo ka mga menor de edad nga gigamit sa cyber pornography lakip na ang pagkasikop sa 20-anyos nga babaye nga maoy giingong operator niini sa Cordova.
Wa isalikway sa opisyal nga nagpadayon ang ilegal nga patigayon sa lungsod ug gani nahitabo sab kini sa ubang dapit sa probinsiya.
Gawas sa bag-o lang nga operasyon nga gilusad sa International Justice Mission ug sa kapulisan, nakadawat ug report si Magpale nga dunay kanhi biktima sa cyberporn diha gihapon sa Cordova nga mao nay nahimo karon nga operator sa maong matang sa negosyo.
Iyang gihulagway nga maka-alarma kini.
Gipaneguro niya nga di pakyas ang kagamhanan sa mga lakang niini pagsumpo sa cyber pornography ilabi na kay duna may mga operasyon nga gipanglusad batok niini.
Sa gihapon, padayong giawhag ni Magpale ang tanang stakeholder nga padayong gukdon ang mga tigpasiugda sa cyber pornography ug siguruhon nga way mga babaye ug mga bata dinhi sa Sugbo nga mabiktima pa niini.
Nagtuo ang bise gobernador nga angayang ilakip sa kawsa ug adbokasiya sa mga magpapili karong barangay ug Sangguniang Kabataan (SK) elections ang pagpakigbatok ning kalihukan ilabi na kay diha kini sagad mahitabo sa kabarangayan.