Ginang, 54, naligsan, patay

Patay ang usa ka ginang human naligsan sa Tunghaan, Minglanilla kagahapon sa pasado alas 6 sa buntag.

Giila ang biktima nga si Neonida Dieparine, 54, single mother, lumad nga molupyo sa Sto. Niño Riverside, Tungha-an, Minglanilla nga nadasmagan sa usa ka Toyota Hi-Ace nga gimaneho ni Lix Gerald Sanchez, 31, minyo, nga taga Punta Princesa, siyudad sa Sugbo.

Sa inisyal nga impormasyon nga nahipos sa Minglanilla Police Station pinaagi ni PO3 Alfredo Pagaling nga ang nakadasmag nga sakyanan gikan sa siyudad sa Sugbo ug paingon sa hagabatang dapit sa Sugbo.

Matod ni Pagaling nga ang biktima mikalit og labang dayong aksidenteng naigo sa sakyanan tungod sa kakusog sa dagan ug nalagpot ang biktima sa karsada.

Matod sa higala sa biktima nga si Barangay tanod Edith Zabate nga si Deiparine kauban ang iyang laing silingan nga si “Loring” paingon sila sa ilang amo sa Primitiva Compound, N. Bacalso St, National Highway, City of Naga, Cebu, kay manggunahay ang duha sa dapit ug maoy panginabuhi sa biktima.

Sa pagtabok sa duha, nakigdungan sila sa usa ka residente sa paglabang kay di kini hanas nga molabang og highway.

Gaduha-duha ang biktima, sa dihang mikalit ug labang ug naigo sa naghaguros nga sakyanan.

Daling nakaresponde ang ambulansiya sa dakbayan sa Naga sa insidente ug gidala ang biktima sa Minglanilla District Hospital apan gideklarar ni Dr. Bella S. Villaganas nga dead-on-arrival ang biktima pasado alas 6:35 sa buntag.