1,900 ka employer nasakpan nga wa mobayad sa mga benepisyo sa SSS

Nakatala na og 1,900 ka mga employer ang Social Security System (SSS) nga wa magremit sa kontribusyon sa ilang mga trabahante isip usa sa benepisyo sa pagpanarbaho sa Sugbo ug Bohol.

Sa pagkakaron gi-turn over na ni nila sa SSS legal team aron kon dili kini makigsabot makasakaan kini nila og kaso base sa Republic Act 8282 kun ang SSS Law.

Matod ni Atty. Alberto Montalbo, officer-in-charge (OIC) vice president Visayas 1 Central Division, nga wa kini nagpasabot nga gikiha ang 1,900 sa pagkakaron tungod kay ila pa kini gipang-coordinate aron mahatagan og kahigayonan nga makuha ilang habig.

“Pero dili buot pasabot niana nga na refer na namo, na filelan na og kaso, wa (pa),” si Montalbo nagkanayon.

Mayoriya sa mga na-refer anaa sa Sugbo tungod sa kadaghan sa kompaniya nga nagtapok sa dakbayan ug sa Metro Cebu.

Moabot na sa 16,000 ka rehistrado nga employer sa SSS ang anaa nakabase sa Cebu City.

Hinuon, base sa mga nangagi nga insidente sa SSS kabahin niining mga delinquent employers, mosulod ra kini og amicable settlement sa legal team sa SSS.

Si Verda Torrefranca, branch head III sa SSS Cebu, nibutyag usab nga di lang ang mga reklamo sa mga trabahante sila mag-agad nga moaksyon tungod kay nagmonitor usab niini ang ilang account officers.

Ang account officers mao ang gitahasan nga magmonitor sa mga nagkadaiyang account sa employer aron masiguro ang pag-remit sa contribution sa iyang mga empleyado.

Ang SSS Cebu branch aduna’y 18 ka account officers. / HBL