ILLEGAL STRUCTURES SA MGA BAYBAYON GUB-ON

Sunod buwan sugdan sa pagpangguba ang illegal nga mga estruktura daplin sa kadagatagan sa Mactan, Lapu-Lapu City.

Si Lapu-Lapu City Mayor Paz Radaza nipahibawo nga ang buhatan sa city legal nipadala na og notisya niadtong mga namuyo daplin sa baybayon nga milapas sa three meter easement.

Unahon sa pagguba kadtong mga estruktura nga gipa-abangan lakip na niadtong adunay mga alad o tangkal sa baboy.

Gibana-bana nga adunay 1,000 ka mga illegal structures nga naglumbay daplin sa baybayon gikan sa Barangay Poblacion, Pajo, Pusok, Ibo ug Mactan.

Ang kagamhanan mohatag og relief goods sa mangaigo sa demolisyon samtang tun-an ang kantidad nga ikatunol sa maapektuhan nga pamilya ilabi na niadtong house owner. Giklaro ni Radaza nga way

relocation site nga matanyag niadtong displaced residents.

Gitinguha sa Siyudad nga kahawanan sa informal settlers ang baybayon aron kalimpyohan ang dagat sa coliform bacteria nga makahatag og dautang epekto sa kinaiyahan ug turismo.

Usa usab sa gikabalak-an sa kagamhanan sa Lapu-Lapu nga mahisama sa Boracay island nga gikatakdang ipasira alang sa rehabilitasyon.

Samtang gimanduan na sab sa mayor ang Tourism Office ug City Environment and Natural Resource Office sa pag-isyu og citation ticket batok niadtong mga kan-anan diha sa Mactan, ang Sutukil restaurant, diin nanglutaw ang mga basura tungod sa ilang establisemento.

Kini human nakuhai og video ang maong dapit sa usa ka netizen og mi-post niini sa social media.

Ang Environment Management Bureau (EMB) 7 nipagawas og resulta sa ilang gihimong pakisusi sa kondisyon sa kadagatan sa Mactan diin nagpakita nga adunay presensiya sa coliform apan di alarming. / FVQ