Traffic jam sa CSCR

Wa pa gani kalingkawas sa grabing kahuot sa dagan sa trapiko nga namugna niining kinalit nga pagtukod sa underpass project sa Mambaling, ania na usay laing sagubangon nga kalbaryo ang taga habagatang bahin sa Sugbo kalabot gihapon sa trapiko. Kon way kausaban sa plano, ugmang adlawa mag-aginod ang dagan sa mga sakyanan nga moagi sa Cebu South Coastal Road tungod kay sugdan na man sa Department of Works and Public Highways (DPWH) ang ilang pag repair sa ikatulong taytayan sa Mananga river nga haduol sa Talisay City Hall.

Si Engr. Almond Dela Peña, ang pangulo sa City of Talisay Traffic Operations and Development Authority (CT-TODA), mipasabot nga bisan tuod og magpadayon ang trabaho sa contractor, duna gihapoy tulo ka mga lane nga paagian sa mga sakyanan.

Gikan sa alas sais sa buntag hangtod sa alas 12 sa udto nga maoy peak hours, duha ka lanes ang magamit sa mopaingon sa Cebu City ug usa ang paingon sa south.

Gikan sa udto hangtod sa alas 10 sa gabii, balihon na sab ang pagamit sa mga lane. Duha paingon sa south ug usa ang paingon sa Cebu City.

Dugang ni Dela Pena nga mopakatap usab silag mga traffic enforcers aron maoy mopahapsay sa pagpalusot sa mga sakyanan.

Pero ambot og unsa ka preparado ang dakbayan sa Talisay sa ilang diversion road. Dunay mga dapit nga gihinganlan si Dela Pena nga mahimong alternative routes sa mga motorista nga gustong molikay sa traffic sa CSCR. Kini mao ang Tabunok ngadto sa Rabaya St. ug ingonan Fidel Bas Sr. paingon sa San Isidro Road nga labaw pang huot sa trapik.

Dinhing mga dapita makita nimo nga gihimong parkinganan sa mga sakyanan ang daplin niini unya duna pay mga traysikad.

Di kaha mapareha ra gihapon ni sa Mambaling, Basak ug Punta Princesa nga nahimong dakong isyu sa publiko tungod sa grabing kahuot sa dagan sa trapiko kay way preparasyon?