Nina Mabatid magkapitan

Unsa bay naa aning posisyon sa barangay nga bisan ang mga personalidad nga successful o malampuson sa ilang kaugalingong propisyon molansar man sa umaabot nga barangay ug Sangguniang Kabataan (SK) elections? Sama sa atong mga kaubanan sa media, ang ubang inilang personalidad media industry, nga naa usab ka public service, magpapili man usab sa umaabot eleksiyon. Bisan sa ubang mga propisyon sama sa mga abogado, medical profession ug mga engineers magpapili man gihapon.

Ang usa sa akong nahibaw-an nga molansar sa barangay election mao ang akong higala nga si Miss Nina Mabatid nga interesado nga molansar sa pagka-kapitan sa Barangay Mabolo, Cebu City diin maoy iyang yutang natawhan. Si Ms. Mabatid malampuson na sa iyang negosyo dili lang dinhi sa Pilipinas kon dili sa gawas sa nasud usab. Siya maoy president and chief executive officer sa Pinoy Care and Visa nga maoy motabang pag-process sa visa ug mopahiluna niadtong mga FIlipino nga gustong mo-migrate sa mga nasod sama sa New Zealand, Canada, Australia ug sa Middle East.

Si Nina nagtubo diha sa daplin sa sapa sa Mabolo. Anak siya ni Manang Salud Ompoc Mabatid, igsoon ni anhing komentarista Atty. David Ompoc. Dugay na kaming nagkahigala ni Manang Salud kay usa siya sa akong loyal nga tigpaminaw.

Taas ang kasinatian ni Nina una niya makab-ot ang iyang kalampusan og nahimutangan karon. Usa ka libro kon atong suwaton. Apan bisan pa man sa iyang kalampusan, wala niya makalimti ang iyang gigikanan. Gusto niyang balikan ang iyang kagahapon ug motabang sa iyang mga kaigsuonan sa Mabolo nga usa sa mga pinakadakong barangay ning dakbayan. Nagsagol ang mga molupyo sa maong barangay. Adunay mga adunahan kay commercial district man og aduna say nga kabus og timawa labi pa kanang mga nagpuyo sa daplin sa sapa sama kang Nina kaniadto. Bisan pa man nagpuyo na siya sa usa ka hamugaway nga panimalay sa usa ka high-end subdivision kanunay gihapon siyang mobisita sa panimay sa iyang Mama Salud.