TAMBAGI KO, NOY KULAS

Naay kamaguwangan

Dear Noy Kulas,

Motuo na gyud ko nga unsay imong gitanom, imo ra ning anihon.

Tagoa lang ko sa ngan nga Ramon, taga Mindanao pero naa na ko sa Cebu gapuyo dugay na. Dinhi ko nag- high school ug nag- college pero human ko ni graduate nipauli ko sa Mindanao. Naglisod ko og trabaho mao nibalik ko diri.

Adtong college pa ko naay koy girlfriend for 3 years pero naputol ang among communication kay niuli ko. Wa ko kahibawo nga nimabdos siya sa among anak nga wa ko makahibawo. While sa Mindanao naminyo ko didto pero naa na ang akong pamilya diri, akong gipabalhin.

Bag-o lang ko nakahibawo nga duna mi anak kay nagpaila nako ang bata dala ang letter sa iyang mama nga namatay adtong 2017. Naa tanang details sa letter parte niya ug sa iyang mama ug akoa. Dugay na diay nahibawo ang iyang mama nga naa na ko sa Cebu pero naglikay kay pareho mi duna nay mga pamilya.

Noy, unsa ang akong buhaton? Ako bang sultihan akong pamilya parte ani? Naglibog ko unsay akong buhaton.

RAMON Ramon,

Imo man gyud kaha nang anak, panubag sa imong responsibilidad. Naa may mga nahitabo nga ingon ana nga later na nahibawo ang amahan nga duna siyay anak. Kon nagduda ka, mahimo nang imong gastuhan, magpa DNA test ka. Apan kon nisalig ka sa imong kanhi nga namatay na, there is no need. Naa man kay lukso sa imong dugo nianang nagpaila nga imong anak? Makahibawo man gyud ta kon atoang dugo kay naa man kunoy pagbati nga di masabot.

Okay ra baya mosulti ka nga duna kay anak nga karon lang nimo nahibaw-an. Wa ka may sala kay inosente ka sa hitabo. Natural lang nga reaction kon ang imong pamilya ma-shock, masuko ug di makadawat. Apan kon molugdang na ang tanan, segurado kong madawat ra kana nila.

Busa, samtang sayo pa, unahag sulti ang imong asawa aron mas sayo nimo masulbad ang problema. Ubani usab ni sa kinasingkasing nga pag-ampo nga unta makadawat sila nga duna kay anak.

NOY KULAS