Cebu, Davao mangapil sa MPBL
Adunay tag duha ka teams gikan sa mga Davao ug Cebu ang ningkompirmar nga mosalmot sa expansion meeting sa Maharlika Pilipinas Basketball League (MPBL) nga gikatakda karong Biyernes sa Waterfront Hotel sa Lahug, Cebu City.
Mismong si MPBL commissioner Kenneth Duremdes ang nipadayag niini sa FoxSports.ph sa text message.
Nagkanayon si Duremdes nga ang Lapu-Lapu City, Cebu City, Davao Occidental, ug Davao City ningpadayag na og interes kabahin sa liga.
Gilaumang mas modaghan pa ang mohatag og kompirmasyon nga moapil sa panaghugpong nga pangulohan ni fighting senator Manny Pacquiao, kinsa maoy utok sa pagkatukod sa nagkadako nga regional basketball league.
Giorganisar mismo ni Pacquiao ang expansion meeting dinhi sa Sugbo aron paminawon ang mga yangungo sa interesadong teams gikan sa Visayas ug Mindanao.
Sa sayo pa, gibutyag nang daan ni Pacquiao nga interesado sab mangapil ang General Santos ug Victorias City sa Bacolod.
Sa laing bahin, nagtuo ang tag-iya sa Batangas City Athletics-Tanduay nga si Bong Tan nga padayong magkadako ang MPBL sa umaabot.
Nagkanayon si Tan nga malipayon sila sa kalampusan sa pagpahigayon sa unang komperensya sa liga diin ang iyang Athletics squad mao ang nahimong kampiyon pinaagi sa pagbuntog sa Muntinlupa, 3-1, sa finals series.
Sa sunod nga komperensya, ang mga nagpasiugda sa liga nagplano nga himuong 20 ka teams ang magkombati.
”Tuluy-tuloy ‘yan basta ‘wag natin pasukan ng pulitika. Basta basketball, basketball,” matod pa ni Tan sa interbyu sa Spin.ph.
Nipahimangno si Tan nga ang MPBL kinahanglang dili mosuway sa pagpakig-atbang sa Philippine Basketball Association (PBA), nga maoy dakong sipyat kaniadto sa nabungkag nga Metropolitan Basketball League (MBA).
“Basta wag natin pasukan ng pulitika at wag gamitin ‘yung pera pera kasi sa MBA, parang tapon pera eh. Talagang mina-match ‘yung PBA eh. Umpisa ka lang, paano mo i-mamatch ‘yung PBA,” pasabot ni Tan.
Nidugang si Tan nga kinahanglang ipadayon lang sa MPBL ang nasugdan niini diin nagtutok kini sa grassroots.
“Gawin nating iba. ‘Yung mission vision, homegrown, grassroots, home-and-away, ‘yung wala sa PBA,” dugang pasabot ni Tan, kinsa nagdumala kanhi og teams sa Philippine Basketball (PBL) ug PBA.
Dili ikalimod nga dako ang kalampusan sa MPBL sa unang komperensiya niini apan giklaro ni Tan nga mapalambo pa kini og dako.