I know in my heart
Wa gyud ko makasabot sa gipakitang mga lihok ni Donna ron. Morag sa akong tan-aw niya, wa siya mahimutang. Morag di siya makatan-aw og diretso nako. Human siya makapangawot sa iyang ulo, miduko siya ug naghinuktok na sab.
“Unsa ba gyuy problema sa pagpangulitawo ni Lemuel nimo, Don?”
Mitan-aw si Donna. Dugay ko niyang gitutokan. Seryuso gihapon siya.
“Nahigugma ko niya, Sandra. Sa tanang nangulitawo nako, kang Lemuel ko naigo sa pana ni Kupido.”
Mi-smile si Donna nako. Ako na sab ang nakapangawot sa akong ulo.
“Unya, unsa man lagi problema ana? Sugta si Lemuel.”
“Kuan man gud, nakaingon na man ko nimo nga true love ka ni Lemuel ug siya maoy angay mong sugton.”
Miyangu-yango ko. Nakasabot na ko sa kaguol nga gibati karon ni Donna. Gikuptan ko ang duha niya ka kamot. Mseryuso sab ko.
“Ayaw na to hunahunaa, Don. Oo, nasayop ka sa imong pagtuo kay kon true love pa gyud ko ni Lemuel, di dayon siya mangulitawo og laing girl, ug ikaw pa gyud nga friend nako. Pero ayaw na hunahunaa. Maoy hunahunaa ug sunda ang pinitik sa imong kasingkasing.”
“Unya di ka masuko kon sugton ko si Lemuel?”
“Masuko?” Mikatawa kog kusog. “Nganong masuko man ko nga wa man koy labot sa iyang kinabuhi? Gi-basted ko na man siya kay si Monsour ang akong love?”
Miyangu-yango si Donna. Nindot na siyag pinahiyoman.
Pagpauli na ni Donna, naligo ko kay nabasa man ko sa pagbisibis ko sa akong mga tanom nga mga buwak sa usa ka bahin sa among lawn. Hilom kong nalipay kay love sab ni Donna si Lemuel. Nasuta ko na sab nga di true love ang gibati ni Lemuel nako. Dali ra siyang nakakitag laing girl nga iyang gimahal.
Duwa-duwa lang tingali ang gibati ni Lemuel nako. Hilumon siya apan sekreto diay og labok. Dali rang makakita og babaye nga gustong himuon niyang girlfriend.
Milabay pa ang mga adlaw. Usa ka gabii, sa gawas mi nag-dinner si Monsour. Misugot ko dihang nakigpanan-aw siya og sine nako. Bisag bag-o ko pang boyfriend si Monsour apan misalig na ko niya. Di lang gugma ang gihatag ko kang Monsour, apil na ang akong pagsalig niya.
(SUMPAYAN)