Mga ‘pala’ sa tindahan

Ayo! Papalita ko’g inspanton, Bay!” ni Anmo. “Kadyot sa, ha...” ni Anko. Midiyong siya sa kainit sa adlaw nga naghingudto na. “Unsay inspanton, Bay?”

“Instant pancit canton, ba!” ni Anmo nga mitingsi.

“A, imo diayng gi-short cut. kabwang!” ni Anko nga mibahikhik.

“Unsa diay imong gibuhat diha, Bay?” ni Anmo.

“Nagpaspas ko sa mga ‘pala’. Bay, nga nanglatay sa estante,” ni Anko.

“A,,, pala. Kanang itom nga hulmigas. Mga pala man na sa tanom, Bay,” ni Anmo human siya molili sa gibuhat ni Anko. “Ayna’g problemaha, uy! Mawa ra man na’g ila ra.”

“Mawa ra diay na’g sila ra?” ni Anko nga miundang og pamaspas. “Uy, nganong namalit man diay ka diri, Bay Anmo. nga naninda man pod ka sa inyong balay sa ubos?”

“Akong gisirad-an, Bay, uy!” ni Anmo nga nagminghoy.

“Uy! Ngano man?” ni Anko nga nahingawa.

“Daghan pod kaayo’g mga ‘pala’, Bay Anko! Maglagot lang ta!” ni Anmo nga milingo-lingo.

“Mawa ra man kaha nang mga ‘pala’ og sila ra? Ingon bitaw ka karon ngari nako.” ni Anko nga naglibog ug mingisi’g hilaw.

“Dili man kanang mga ‘palaha’ ang akong gipasabot,” ni Anmo nga mikawot sa iyang bungot.

“Unsa man diay’ng mga ‘palaha’, Bay?” hinay nga misulti si Anko.

“Da, kana gong mga ‘pala’ nga tawo,” ni Anmo nga misulimbat ang mata.

“‘Pala’ nga tawo?” ni Anko. Mibudlot ang iyang simod ug mikunot ang agtang. Wa pa siya kasabot.

“Pala-utang nga tawo, ba!” singgaak ni Anmo dayong lakaw.

“Uy, imong inspanton, Bay, O! Ay’g kalimti,” sangpit ni Anko.

“Ambi, bi,” ni Anmo nga misakmit sa inspanton.

“Bayad bi,” ni Anko nga mibukhad sa iyang palad.

“Ilista lang sa ni,” mingisi si Anmo.

“Utro man sab diay ka nga ‘pala’,” ni Anko nga nagkatawa.

“Komedya ra, uy! Dia ra, O,” ni Anmo nga mitunol sa kuwarta ngadtong Anko.

Nagbahikhikay silang duha ug nangatawa, daw mga bata nga nahimuot sa ilang duwa.

(KATAPUSAN)