P5M NGA MARIJUANA NASAKMIT

Moabot ngadto sa kapin sa P5 million nga balor sa tinanom nga marijuana ang naibot sa kapulisan sa managlaing mga lugar sa probinsya sa Sugbo.

Niadtong Miyerkules sa buntag, ang Badian police station inabagan sa Provincial Mobile Force Company ug Philippine Drug Enforcement Agency 7 nakaibot og di momenos 5,000 ka punoan sa marijuana sa Barangay Malagaring, bukirang dapit sa lungsod sa Badian.

Nakadawat og impormasyon ang Badian police gikan sa usa ka residente nga dunay mitubo nga punoan sa marijuana sa maong lugar nga maoy hinungdan nga ilang gilusad ang operation.

Wa silay nadakpan nga nagtanom sanglit nahimutang kini sa hilit nga dapit ug ang yuta gipanag-iya sa gobierno.

Samtang laing operation ang gihimo sa Balamban police station sa sitio Lacdon, Barangay Cabasiangan, bukirang barangay usab sa maong lungsod.

Ilang naibot ang 15,308 ka hingkod nang marijuana.

Lakip sa ilang nakuha ang 2,308 ka mga seedlings nga gitanom sa usa ka umahan pipila ka metros lang ang gilay-on sa panimay ni Joel Gabutin Narvasa, 31, minyo,nagpuyo sa maong lugar.

Moabot ngadto sa P3,155,120.00 ang balor sa tanang punoan sa marijuana nga ilang nasakmit.

Tungod sa kalayo sa maong dapit, nakahukom ang Balamban police nga didto nalang kini sunogon.

Matod ni Police Supt. Rene Kyamko nga sa ilang nakuha nga impormasyon midaghan ang marijuana plantation sa probinsya tungod posibilidad nga mi balhin na sa paggamit sa marijuana ang mga drug user nga tig gamitan sa shabu.