5T MISAKSI SA KADAUGAN SA MACTAN
Di lang sa kasaysayan nagmadaugon si Lapu Lapu batok kang Magellan, ang Lapu-Lapu City usab nagmadaugon sa natad sa turismo sa rehion 7.
Kagahapon, gibana-bana nga moabot sa 5,000 ka mga tawo ang ningsaksi sa bongga nga
re-enactment sa Kadaugan sa Mactan sa Liberty Shrine, Barangay Mactan, Lapu-Lapu City.
Gipahibawo ni Shahlimar Hofer Tamano, regional director sa Department of Tourism (DOT)7, nga haom ang iyang balita alang sa Oponganon human nga ang ilang buhatan mipagawas nga talaan nga sa miaging tuig, Siyudad maoy
number one tourist destination sa mga international ug local tourist sa tibuok region 7.
Sa 2.9 milyon nga misuroy o miduaw sa rehiyon niadtong 2017 ang siyudad sa Lapu-Lapu adunay kapin sa 1 milyon ka mga turista nga midagsa.
“For context lang ha, it’s bigger than Boracay,” tipik sa pamahayag ni Tamano.
Matod pa sa opisyal nga nagpabilin nag-una sa gidaghanon ang mga Koreans nga miabot og 800,000, gisundan sa Chinese tourist nga kapin sa 400,000 ug Japanese nga moabot sab sa dul-an sa 400,000.
Sa maong data, adunay 75 porsento nga increase sa Chinese tourist ug 70 porsento sa mga Taiwanese.
Dugang pa Tamano nga gibana-bana nga ning tuiga moabot sa 7.5 milyones ka mga turista ang modagsa sa Visayas area ilabi na nga sa di madugay moabli na ang bag-ong Terminal II sa Mactan Cebu International Airport ingon man ang Panglao, Bohol moabli sab sa ilang international airport.
Si Lapu-Lapu City Mayor Paz Radaza nihangop sa maong kalambuan.
Siya niingon nga pinaagi sa tourism office, inabagan kapulisan, nihimo sila sa ilang tagsatagsa ka mga gimbuhaton aron mapatunhay ang kalimpyo, kahusay ug kalinaw sa dakbayan.
Pulong pa sa mayor nga ang kasaulogan sa Kadaugan sa Mactan nga miabot na sa ika 497th anniversary gihalad sa kaisog ug bayanihong buhat ni Datu Lapu-Lapu nga nanalipod sa Mactan nga magsilbing inspirasyon sa mga residente alang sa mas malambuon nga dakbayan.
Makita ang nagkanindot nga pasundayag sa re-enactment diha sa baybayon sa Liberty Shrine, barangay Mactan diin ang lead cast gilangkuban
sa varsity player turned model/actor Derick Hubalde; Cebuana actress Dionne Monsanto isip Reyna Bulakna, ug ang actor nga si Adrian Luis Alandy nga maoy Ferdinand Magellan.
Ang re-enactment nga gihimong musical theatre play ubos sa direksiyon ni Rudy Aviles samtang si Victor Cuenco nagsilbing creative director sa maong kalihokan.
Ang inila nga kompositor nga si Isagani Villarojo maoy nigama sa mga Binisaya nga awit alang sa maong re-enactment ingon man ang official jingle nga Kadaugan. /