SEGURIDAD HUGOT, DRUGS MILUSOT
NOTEBOOK, KUWARTA, CELL PHONES NASAKMIT SA CPDRC
Taliwa sa gipahugtang seguridad, moabot sa 41 ka gagmayng mga pakete sa gidudahang shabu, drug paraphernalia, 51 ka mga cellphone, mga hinagiban ug dul-an P100,000 nga salapi ang nasakmit sa mga awtoridad sa laing greyhound operation nga gipahigayon sa Cebu Provincial Detention and Rehabilitation Center (CPDRC) kagahapon sa buntag.
Si Supt. Mario Baquiran, pangu sa 1st Company sa Provincial Mobile Force Company nga nadestino sa CPDRC, nibutyag ang mga pakete sa gidudahang shabu nakuha gikan sa Cell 103 diin dunay mga high
profile inmate ang gibalhog, apil sa 25 ka mga piniriso.
Apan dili sila makatumbok kon kinsa nga piniriso ang
tinubdan sa maong gidudahang gidili nga drugas kay tinuon pa kini sa ilang imbestigasyon. Apil sa nakuhaan og mga cellphone ang selda nga nahimutangan sa gidudahang drug personality nga si Alvaro
“Barok” Alvaro.
Ang hiniusa nga operasyon gihimo sa pakigtambayayong sa tagdumala sa prisohan tali sa mga sakop sa Philippine Drug Enforcement Agency (PDEA) 7, Provincial Intelligence Branch (PIB) sa Cebu Provincial Police Office, Task Group Cebu sa Armed Forces of the Philippines, ug PMFC.
Si Earl Rallos, chief operations officer sa PDEA7, namahayag nga nabantayan nila nga nagkakunhod ang mga kontrabando nga ilang nasakmit sa mga greyhound operation.
“It only shows that the management of Cebu Provincial Detention and Rehabilitation Center has been very strict and that’s
why we have minimize the entry of
contraband here,” dugang niya. Ilang tun-an ang nakuha nga mga ngalan sa notebook nga dunay mga dagkong kantidad sa transaksyon.
Matod niya sa mga tigbalita, nga dili pa sila makasulti kon transaksyon ba kini sa drugas sanglit ilahang sutaon ang maong ebedensiya nga kauban sa mga kontrabando sama sa gidili nga drugas.
Si Supt. Rene Kyamco, hepe sa PIB-CPPO mibutyag sa Superbalita nga ang nakuhang 51 ka mga selpon ilang isumiter sa Cyber crime aron masuta kon kinsa ang mga contact niini sa gawas sa prisohan pinaagi sa mga mensahe.
Ang gidudahang shabu nga nasakmit gibanabanang mobalor og kapin sa P11,000 ug motimbang og 1.23 gramos.
Si Roberto “Bobby” Legaspi, acting warden sa CPDRC, wala na masurprisa sa laing mga kontrabando nga nasakmit ug iyang itugyan kang Gobernador Hilario Davide III kon unsay mamahimong aksyon nga himuon.
Matod sa treasurer sa mga piniriso nga iya sa kooperatiba sa prisohan ang kwarta nga P94,388 nga halin sa canteen.
Apan matod ni Legaspi sakmiton gihapon nila ang P94,388 nga gisud sa steel box nga gikan sa canteen ug ang P3,790 nga mga sinsiyo nga gikan sa mga selda.
Si Legaspi nipasabot nga base sa opinyon sa Commission on Audit ang makuha nga kwarta gikan sa prisohan kay kabahin gihapon sa kontrabando.
Suma niini dili lehitimo nga kooperatiba ang kooperatiba sa mga piniriso kay wala kini marehistro sa Cooperative Development Authority (CDA).
“They call it a cooperative inside but it’s illegal. It’s not legitimate,” dugang niini. /