3 sa 38 ka barangay di ma drug-cleared
Tulo ka mga barangay sa lalawigan sa Sugbo ang dili na maapil sa re-deliberation sa Oversight Committee karong Mayo 4 aron madeklarar nga drug-cleared.
Si Ivy Remedios Durano-Meca, pangu sa Cebu Provincial Anti Drug Abuse Office (Cpadao), nibutyag nga base sa revalidation sa Philippine Drug Enforcement Agency (PDEA) 7, nahibaw-an nga ang tulo ka mga barangay duna pay presensiya sa high value target kun mga personalidad nga gidudahang nalambigit sa gidili nga drugas.
Sa tulo, usa ang naa sa siyudad sa Danao ug duha sa lungsod sa San Remigio.
Ang tulo ka barangay inisyal nga naapil sa 38 ka mga barangay nga sunod madeklarar nga drug-cleared kuyog sa 160 ka mga barangay nga una nang gideklarar sa Oversight Committee.
Si Meca niangkon nga maong wala madeklarar nga drugcleared ang ubang mga barangay kay gikorihian nila ang mga pamaagi sa revalidation sa mga barangay.
Siya nipasabot ang gibuhat nila kaniadto sa onsite validation kay sila lang sa Cpadao ang naghimo karon, giawhag na nila ang mga representante sa PDEA 7, Department of Health ug opisyal sa Department of Interior and Local Government nga nadestino sa lungsod o siyudad nga mokuyog nila.
“Kay lisod man gud kung ang Cpadao ra ang mag onsite, kita ray makakita sa real situation sa barangay and then sa drug clearing there are a lot of parameters that needs to be assist by the different agencies,” pagpasabot ni Meca.
Iyang gihimo nga sanglitanan ang community-based treatment program nga lisod kon ang Cpadao maoy mo-validate onsite sa programa sa kabarangayan.
Matod niya, ang DOH maoy motan-aw sa nagpadayag nga CBTP sa mga barangay subay sa Matrix Intensive Outpatient Program (MIOP).
“Though we know what is MIOP, pero mas maayo if it would be DOH who will really look into the ongoing community based treatment in the barangay. Dili nato maingon ba nga gibastabasta nato gi-validate,” dugang ni Meca.