MUSYON NI PETER LIM IPABASURA SA OSG
Mihangyo ang Office of the Solicitor General (OSG) sa Department of Justice nga ibasura ang motion sa magpapatigayon nga si Peter Lim nga nagtinguha nga ipahunong ang reinvestigation batok niya ug ubang personalidad bahin sa giingong kalambigitan niini sa gidili nga drugas.
Si Dioscoro Fuentes Jr., tigpamaba ni Lim, niingon ang mga abogado na sa negosyante nga nagbase sa kaulohan ang motubag o mohimo og aksyon batok sa komento sa OSG.
Sa pito ka pahina nga komento, ang OSG nihangyo sa DOJ nga dili uyonan ang motion ni Lim nga gusto nga ipabilin ang naunang resolusyon sa kanhi panel of state prosecutors nga nagbasura sa reklamo nga gipasaka sa Philippine National Police batok niya ug ubang gidudahang personalidad sa gidili nga drugas.
Sa Lunes, gitakda ang laing preliminary investigation sa bag-ong panel nga giumol ni kanhi Justice Secretary Vitaliano Aguirre II, diin ang Criminal Investigation and Detection Group gitahasan nga moduso og dugang mga ebidensya batok ni Lim ug ubang personalidad nga gidudahang nalambigit sa gidili nga drugas.
Sa komento, matod sa OSG, ang kamandoan ni Aguire II pinetsahan og Marso 19 alang sa subling pag-imbestigar sa reklamo nga gipasaka batok ni Lim ug ubang personalidad, kay gipasubay sa balaod, mga pamaagi sa lagda ug jurisprudence.
Ang kampo ni Lim nipasangil nga gibasehan ni Aguirre ang iyang kamandoan sa pulso sa katawhan ug kasuko sa mga tawo.
“Under these circumstances, it is clear that the former Secretary of Justice issued the March 9, 2018 order because he had every reason to believe that the dismissal of the complaint would cause a probable miscarriage of justice to the entire People of the Philippines,” sumala sa komento sa OSG nga gipublikar sa GMA News Online.
Dugang sa komento sa OSG, si Kerwin Espinosa, usa sa gipasanginlang drug personality, niangkon mismo sa iyang mga kalihokan sa gidili nga drugas atol sa Senate hearing ug nitug-an sa iyang judicial affidavit sa giingong kalambigitan ni Lim ug sa gidudahang drug lord Peter Co.
Matod sa usa sa mga abogado ni Lim, Magilyn Loja, nabalaka sila nga malapas ang tawhanong katungod sa ilang kliyente sa due process ug paspas nga pagdungog gumikan sa resolusyon ni Aguirre, hinungdan niduso sila og mosyon alang sa pagpabasura niini sa naunang kamandoan ni Aguirre.
Sumala sa komento sa OSG, ang kamandoan naa sa gahom ug awtoridad sa kalihim sa Hustisya.
Niadtong Disyembre 20, 2017, ang panel sa mga piskal nibasura sa reklamo batok ni Lim ug kaubanan sa gidudahang nalambigit sa gidili nga drugas, apan pagka Marso lang ning tuiga nahibaw-an.
Tungod niining kontrobersiya, si Aguirre niluwat sa katungdanan apan nimando og pag-review sa reklamo ug niumol og bag-ong panel sa mga piskal.