Traffic enforcer nga nasakpan nga mi-counterflow gitaktak ni Osmeña
Dili na makabalik sa serbisyo isip traffic enforcer nga nadakpan nga ni-counterflow sa dalan sa dakbayan sa miaging adlaw.
Mao kini ang gibutyag ni Mayor Tomas Osmeña atol sa press conference kagahapon sa buhatan.
“I’m trying to get the name (of the traffic enforcer), he is going to be fired,” bug-at nga pulong ni Osmeña.
Kahinumdoman, ang usa ka traffic enforcer sa dakbayan, kinsa off-duty niadtong higayona, atong adlawa nasakpan nga ni-counterflow sa kadalanan sa General Maxilom Avenue ug gisikop sa iyang mga kauban nga traffic enforcers.
Gidugang usab ni Osmeña nga dili niya tugotan nga magpabilin ang mga abusado sa buhatan sa gobyerno.
“I dont need them. It’s bad image for the whole CITOM (Cebu Integrated Traffic Office Management),” dason niya.
Matod niya nga isip usa ka kawani sa gobiyerno nga tigpatuman sa mga balaod kinahanglan nilang magsilbi nga ehemplo alang sa uban.
Gipasabot sab ni Osmeña nga dili na siya mopahigayon og imbestigasyon gawas kon makapasabut ug makahatag ang maong enforcer og balido nga rason.
“(Under) my watch, you are guilty unless you prove that you are innocent,” dugang niya.
Nasayran nga mga gipahigpitan karon ang pagpatuman sa balaud ug mga lagda sa trapiko tungod sa nagkagrabe nga problema sa trapik.
Daghan nang nangasikop nga motorsilo ug bisan mga sakyanan nga ni-counterflow.
Lakip sa gibantayan mao ang pagpasagad og park sa kadalanan hinungdan nga gihingosgan ang clamping ug towing sa sakyanan nga dili motuman sa balaud.