Mga SK nga tikasan

Moabot ngadto sa 136 ka mga kandidato sa umaabot nga barangay ug Sangguniang Kabataan (SK) election ang gi-disqualify human masuta sa adunay mga tinuyo nga kasaypanan sa ilang pag fill up sa certificates of candidacy (COC). Sagad ra ba diay kuno niini mga kandidato sa SK.

Si Comelec Provincial Officer Ferdinand Gujilde mibutyag nga dunay uban nga gituyo pagpapas ug pag-usab ang ilang edad aron paglikay nga maigo sila sa age limit.

Sa balaod gud kadto lang nagpangidaron og 18 anyos ngadto sa 24 anyos ang gitugotan nga makasalmot sa piniliay.

Nangabunggo ning maong mga kandidato human nga gi- verify sa Comelec diin nasuta nga lahi ang ilang record sa pagparehistro ug lahi usab ang ilang gisuwat sa ilang COC.

Unya duna pa diay mga ni-file og COC nga wala marehistro. Tan-awa ra. Bata pa gani di na mahadlok manikas ug mamakak. Dako kining sukwahi sa katuyoan sa SK.

Ginaingon nga mga kabataan maoy paglaom sa atong nasod ug kinahanglan kini magiyahan sa tarong ug matinud-anon nga pagserbisyo sa gobiyerno kay lagi sila man unya ang sumosunod nga modala sa renda sa pangagamhanan.

Pero ang nahitabo karon, makapasagmuyo kay ang pagpanikas ug pamintaha mao na hinuoy nisantop sa alimpatakan sa atong kabatan-onan.

Dili ba mao man kini hinungdan kon nganong nawagtang sa miaging mga katuigan ang SK?

Dili ba gihugon-hugonan nga hingpit na kining papason tungod kay imbis kaayuhan, mga binuang na hinuon ang ilang nakat-onan?

Kon tinud-on, kining mga nanikas posibling mapasakaan usab og kasong perjury tungod kay ang COC nga ilang gipirmahan ubos man sa panumpa ug dili na hatagan og kahigayonan nga makaserbisyo sa gobiyerno kay lagi tikasan man.