Pobreng Hamugaway
Naka dungog ka naba ining pulong ‘pobring hamugaway’? Makapahinuklog kini og pasabot kay unsaon man tuod pagka-hamugaway kung ikaw ordinaryo nga mamumuo ra nga nagsalig sa kinsenas ug tapos buwan nga sweldo para ipalit og pagkaon, i-renta sa gipuy-an, ibayad sa tuition, tubig, suga ug uban pang inad-adlaw nga panginahanglanon para mabuhi.
Sa akong kaugalingong pagsabot, ang pagpuyo og hamugaway nga estado naa sa atong tagsa-tagsa ka alimptakan ug huna-huna. Kini nagdepende sa atong panan-aw ug diskarte sa pagpadagan sa kinabuhi, ug paghatag og balor sa mga gasa, bahandi ug pahalipay nga di makita o mapalit.
Diay gihimong listahan si Richard J. Foster, usa ka maglilindog sa New York: Harper One, sa iyang artikulo nga gi-ulohan og ‘Live Simply’ nga mga praktikal nga pama-agi kung unsaon pagpuyo nga haruhay ug hamugaway bisag di tubig-tubigan.
Matod ni Foster unahon pag-disiplina ang kaugalingong sa pagpamalit og butang basi sa gamit o panginahanglanon niini ug dili sa ‘brand’ o sa pangalan sa tindahan nga gipalitan labi na kung ang tumong magpa-ibog, magpa- impress o para daygon lang sa uban .
Hinay-hinayon sab og undang ang kina-iya nga ‘impulse buying’.
Pahatan og oras ang pagbahig sa mga materyal nga butang. Ipabilin ang labing gikinahanglan ug kanunay nga gigamit ug ibaligya o ipang-hatag ang mga subra nga wala na gamita ngadto sa uban nga labing nanginahanglan. Gawas nga makatabang, ma hapsay pa imong palibot.
Ayaw sab pa- tintal o padala dayon sa imong madungog o makita nga mga puro-paganda. Hinumdumi nga tanang panindot ug padani ilang buhaton aron ka mopalit ug makuha sa dayon imong kwarta.
Daginuta bisag gamay imong matigom sama sa subra nga balon o pamelite unya adto pagsuroy sa mga pampublikong lugar nga way bayad o entrance fee sama sa parke.
Tigumi sa layo pa ang mga umaabot nga espisyal nga selebrasyon aron dili magkadipo-dipo.
Sa katapusan, hinumdumi ang paglikay pag-gasto og dako o labaw pa sa kinitaan para di maputos sa utang.