Mamumuo naligsan sa balaod

Gilauman sa mga mamumuo o mga anak sa singot ang gisaad ni Pres. Rodrigo Duterte nga luwatan na ang Executive Order nga motapos sa kontraktwalisasyon. Balaod nga gipahimuslan sa mga kompaniya ang paglihay sa SSS, Pag-ibig, Philhealth, 13 th month pay ug bonus. Nahimong kalbaryo sa mga mamumuo.

Mga employer nahisama sa alimatok nga kusog mosopsop sa singot og kabudlay sa mga kabos. Maong dili magmalinawon ang industriya kon ang mga kompaniya dili makasabot sa pinitik sa pulso ug dili makatugkad sa lupad sa mga trabahante. Ang pagpapas sa Contractualization Law gisaad atol sa kampanya apan dili mapadali kay daghan ang konsiderasyon ilabina sa mobunlot nga mga magpapatigayon. Regional Tripartite Wages and Productivity Board (RTWPB) sa DOLE 7 nakadawat og duha ka petisyon pagpataas sa sweldo.

Cebu Labor Coalition nangayog 150.55 pesos across-theboard wage hike matag adlaw. ALU-TUCP nangayog 120 pesos. Minimum karon 366 pesos sa class A cities ug municipalities, 333 pesos Class B, 323 pesos Class C ug 308 pesos Class D. Ngano kaha nga lain-lain man ang suholan nga parihas ramag tiyan nga gutomon.

Gitumong alang sa kaayohan ang Tax Reform for Accelaration and Inclusion (TRAIN) Law (RA 10963) apan giabusohan sa mga magpapatigayon.

Sweldo, bonus ug tanang benipisyo sa mga mamumuo dili na buhisan. Adto bawion sa pagpataas sa excise tax sa mga sakyanan, produktong petrolyo, sigarilyo ug softdrinks diin ang kinitaan ihapak sa 8T pesos nga infrastructure programs nga gihanay sa administrasyon.

Ang excise tax pagpanday sa TRAIN gikwentada nga dili mahirada ang mga negosyante apan unsay gidugang sa ilang buhis adto ipatong sa ilang negosyo kay mahadlok nga maalkansi sa ilang ginansya. Nakamugnag kabalaka kay ang chain reaction o domino effect mao ang pagsaka sa mga palaliton ilabina sa batakang panginahanglan, pletihan, korente, tubig ug uban pa. Inutil ang DTI nga ingon og wala manumbaling pagsaka sa bili sa mga palaliton nga gipahimuslan sa mga negosyante.

Naapektohan ang sektor sa mga mamumuo kay naligsan sa balaod. Gisakyan sa mga kaatbang ni Duterte lakip na sa Macabayan bloc nga gipayongan sa NDF nga maoy politikanhong kusog sa CPP.

Panahon ni Pres. Ferdinand Marcos ang industriya sa lana regulated diin ang kagamhanan maoy moabaga pinaagi sa Oil Price Stabilization Fund nga nagsanta usab sa cartel sa lana. Apan gitangtang sa nagsunod nga administrasyon gipaubos sa deregulated pinaagi sa Oil Deregulation Law.