Pagpanghasi sa ting-init
Mga sakit-sakit sa panit ang nitakboy sa daghang piniriso ning panahon nga nasinati ang grabing kainit. Mao ni gitug-an ni Jail Supt. Jessie Calumpang, ang warden sa Mandaue City Jail Male Dorm ug ni Jail Sr. Insp. Stephanie Salazar sa Female Dorm.
Wa pa ni labot sa ubang prisohan nga wa pa nako maadtoi. Ang hinungdan mao ang grabing kainit sa panahon. Hibaw-i nga ang atong mga prisohan para lang sa ginatos o di kaabot ug usa ka gatos ka piniriso. Nagsinardinas unya pun-an pa sa kainit sa panahon mao nga naapiki ang ilang panglawas.
Lain nga akong nasayran didto mao kadtong mga piniriso nga may gihambin nga balatian sa ilang dugo. Hugot nga monitoring sa mga nurse sa mga pimiriso nga taas ug dugo.
Ilabi na sa mga senior citizen. Busa kadtong wa pa maka bisita sa ilang mga minahal sa kinabuhi sa mga prisohan karon ang tukma nga panahon nga inyo kanang buhaton. Ayaw mo ug kaikog paghangyo sa mga tinugyanan sa prisohan pagpasusi sa panglawas sa inyong duawon kung nakita ninyo nga nagkinahanglan silang hilngon og doktor.
Estoryahi ang nagduty nga nurse. Gawas sa kainit sa panahon problema sa atong mga prisohan ang supply sa tubig. Apektado ang ilang pagka ligo. Matod ni Supt. Calumpang naa silay dagkong tangki nga punduhanan apan sa akong tan-aw kinahanglan nga dugangan pa ni apil na sa female dorm.
TURISTA
Sirado na ang Boracay. Matod sa mga tinugyanan sa turismo dinhi sa ato ilaha na nga nabatyagan ang pagpangabot sa mga bakasyonista nga nipili sa atong dapit human tak-upi ang Boracay nga maoy una nilang gipili nga adtoan.
Sa pangutana kung andam na ba ta sa pag-abi abi nila ang ilang tubag ready na. Naay daghan nga distinasyon nga moparang sa ka nindot sa Boracay.
Way lalis nga naay daghang kapilian. Gani ang mga hotel ug resort operators taudtaud na nga nangandam. Pero ari ta sa mga turista nga mopili sa mga ubos ug budget nga suroy suroy.
Ang uban adto motugpa sa mga lugar pinaagi sa pagsakay sa atong mga bus ug ubang pasaheroan. Usa ni ka dakong hagit ilabi na sa mga local government units diin nahimutang kining mga suroyanan.
Ang bintaha gyud unta kung di ta makadungog ug estorya sa mga pagpahimulos sa higayon sa uban nga nagserbisyo ani nila.
Nindot ang suroyanan pero daw langit ang kataas sa presyo sa puy-anan, sakyanan , pagkaon ug ubang kahimanan nga gustong abangan sa mga turista. Angayan ni nga monitoron. Kay kung magpatuyang sila sa ilang gibati mapagan ang mga nagtinarong. Kana lang daang plitihan sa habal habal. Kung bunalan sa driver ang iyang pasahero wa gyu’y dag-anan.