Maorag scorer

Dear Noy Kulas,

Maayong adlaw ninyo diha. Tagoa lang ko sa alyas nga Medy.

Kining akong suliran dala ni sa akong konsensya. Naa koy amiga nga minyo sama nako pero problematic ang iyang married life. Suod kaayo mi nga amiga sukad pa sa una.

Kini siya dunay boyfriend kaniadto pero naminyo og lain kay nimabdos ang babaye. Mao na nga wa sila magkadayon. Ang asawa aning mao nga lalake toa sa abroad ug magpadad an lang og kwarta diri. Mga 5 years na nga wa mouli ang asawa mao nga nagduda ang bana nga naa nay lain didto kay di na man mo contact sa iyaha, sa ila na man lang mga anak.

Karon nabalik ang ilang contact tungod sa Facebook. Nagkita, nagkabalik ug dunay nahitabo sa akong amiga ug sa iyang ex. Kining akong amiga pirme ko dad-on sa ilang mga lakaw aron di sila dudahan. Kon mang check-in na sila, ibilin ra kog coffee shop ug balikon pagkahuman.

To be frank, gilainan ko gahunahuna sa ilang gibuhat kay minyo man sab ko pero maayo ang akong pagpuyo. Pero suod nako ang akong amiga, di ko makaako sa pagsulti. Unsaon kaha nakog approach no? MEDY

Medy,

Batasan natong mga Pinoy ang maikog mosulti bisan nakahibawo tang sayop ang gibuhat sa atoang higala. Di kita gustong makapasakit og sulti bisan gikinahanglan nga korihian ang sayop.

Kay magpanuko man ka, pangitag paagi nga makalusot ka aron moundang na ka og kuyog nila. Pag busy sa laing mga buhat aron duna kay rason nga di na ka pirmeng makigkita niya. Kon magsige og pangulit, prangkahi na lang nga wa ka makauyon. Ingna nga sahi ra sab kon ikaw ang mahitaboan, di ka gyud malipay, di ba? Mao nay isulti niya. Di baya na dautan ang pagbalibad kay naa ka sa hustong side.

Ayaw kahadlok kay ang tinuod nga higala, makahuna-huna usab sa side sa pikas. Kon tinuod siyang higala ug wa manggamit sa imoha, di niya na angay nga ikasuko kay wa man ka manghilabot kaniya.

NOY KULAS