I know in my heart

Nagpaniid ko kang Monsour. Sa balcony mi nanglingkod. Wa masulod sa akong ulo ang salida nga among gitan-aw. Wa ko mahimutang. First time pa kini nako nga mikuyog og lalaki sa pagpanan-aw og sine. Sus, gitugnaw ko kay kusog ang aircon sa among nahimutangan. Nakapangyugpos ko.

Gigabling ko ni Monsour. Wa ko mosupak dihang iya kong gigakos. Medyo nakuha-kuhaan ang katugnaw nga akong gibati. Nabatyagan ko ang kainit sa lawas sa akong boyfriend. Apan mao ra kadto ang gibuhat ni Monsour. Wa siya mopahimulos sa higayon nga naa mi sa ngitngit nga lugar. Wa ko niya hagki. Nakapahiyom ko sa hilom. Gentleman ang akong trato.

Komportable na ko sa pagtan-aw sa salida. “Mag-esnak sa ta, Sandra.” Nag-agbay si Monsour nako samtang nanggawas mi sa sinehan. Nahuman na ang pagtan-aw namog salida.

“Busog pa man ko, Mon. Mopauli na ko.”

“Sige. Ihatod tika sa inyo.” Sayo kong misulod sa akong kuwarto pagkahuman nakog panihapon. Sila si Mama ug Papa nanan-aw sa gisunod nilang TV series. Bisag mga hamtong na sila, sweet gihapon sila. Nagtupad silag lingkod sa taas nga sopa. Nagsandig si Mama sa dughan ni Papa. Nakapahyom ko. Malipayon ang akong mga ginikanan. Gani, wa man gyud ko makadungog nga nag-away sila.

Ug maoy akong pangandoy nga mahisama ko nila sa higayon nga magminyo na ko. Pangandoy nako nga ang akong mabana parehas og kinaiya ni Papa. Buotan si Papa ug masinabuton. Nuon, sa sulti ni Mama nako, buguon si Papa sa ulitawo pa. Apan di palikero.

Aw, parehas sila si Monsour. Buguyon man manglihuk-lihok si Monsour. Di sab playboy. Unta, si Monsour ang para gyud nako ug maparehas siya kang Papa nga mapinanggaon og asawa ug anak. Pinangga mi si Mama ni Papa.

Hapit na ko makatulog dihang mitingog ang call alert sa akong selpon. Sa pagsusi ko pa, si Donna ang nanawag.

“Gisugot ko na si Lemuel, Sandra.”

Sa tingog pa lang ni Donna, naklaro ko na nga malipayon siya.

“Maayo nuon, Don. Love man nimo siya. Unsa pa may dugayan?”

Mikatawa sab ko. Daghan mig giestoryahan si Donna bahin sa among boyfriend. Nasabtan nako nga dunay dakong pagsalig si Donna kang Lemuel.

(SUMPAYAN)