MINGLANILLA DI MODUWA: MEJIAS
Wala nakauyon ang Minglanilla Archangels sa desisyon sa mga nagpasiugda sa Governor’s Cup basketball tournament nga paduwaon sila’g balik batok sa Naga Electrifiers sulod lang sa lima ka mga minutos kabahin sa kontrobersya nga miulbo sa torneyo ning bag-uhay lang.
Sa pagpakighinabi ning mantalaan, si Concordio Mejias, municipal administrator sa Minglanilla, nagkanayon nga dili sila makigduwa og balik sa Electrifiers tungod kay alang kanila dili makiangayon ang desisyon.
Nahitabo ang kontrobersya dihang wala nabantayan sa mga referee nga unom ka mga magduduwa sa Naga
ang naa sa sulod sa korte sa himatyong segundos ug tuod man, nakamugna og buzzer-beater three-point shot ang Electrifiers nga maoy nagpadaog kanila, 91-92.
Dihang ilang nabantayan nga adunay unom ka mga magduduwa ang Naga niadtong mga gutloa, ang Archangels mipadangat dayon og opisyal nga protesta.
Ang mga nagpasiugda nga gilangkuban ni Cebu Provincial Sports Commission executive director Atty. Ramil Abing ug technical committee nga gipangulohan ni Danny Duran nagpahigayon og duha ka mga adlaw nga delibirasyon aron makapagawas og desisyon.
Gawas nga ilang pabalikon og duwa ang duha ka mga kampo apan sulod lang sa lima ka mga minutos, ang mga nagpasiugda mipahamtang og indefinite suspension ngadto sa tanang referees ug
game officials niadtong duwaa.
Sa ilang resulosyon, nakita sab sa mga nagpasiugda nga adunay salaod si Naga coach Renato Alforque sa maong
nahitabo.
Nagkanayon si Mejias nga kon ipatuman gyud sa mga nagpasiugda nga paduwaon og balik ang Archangels ug Electrifiers, mas maayong ipahigayon kini inig human na sa tanang mga duwa sa elimination round.
Gipasabot ni Mejias nga inig human sa elimination round, masayran na kon
non-bearing o bearing pa ba ang kontrobersyal nga duwa.
Kon non-bearing, matod ni Mejias nga dili na kinahanglang magduwa og balik ang Archangels ug Electrifiers apan kon bearing, ning sitwasyuna kinahanglan na nilang tumanon ang desisyon sa mga nagpasiugda.