BUCKS MITABLA SA SERIES, 3-3

Gipagawas ni Giannis Antetokounmpo ang tanan niyang makaya aron agakon ang hosts Milwaukee Bucks sa 97-86 nga kadaugan batok sa Boston Celtics nga maoy nakapugos og deciding Game 7 sa ilang 1st round playoffs series sa National Basketball Association (NBA) kagahapon.

Si Antetokounmpo nagpakatap og 31 puntos lakip na niini ang importanteng mga puntos sa krusyal nga bahin aron pangulohan ang kadaugan. “At the end, it was (all) about will,” matod ni Antetokounmpo, kinsa nakadugang sab og 14 rebounds.

“I was out there, I was trying to make plays, I was trying to be aggressive.”

Wala sab hinuon magkuwang ang suporta ngadto kang Antetokounmpo hinungdan nga ninglampos ang Bucks.

Sila si Khris Middleton ug Malcolm Brogdon nidugang og 16 puntos alang sa Bucks.

Kontrolado sa Celtics ang sayong bahin sa kombati apan sa pagpangulo ni Antetokounmpo, ang Bucks nakamaneho pagposte og 48-39 nga labaw sa tungatungang bahin sa 2nd quarter.

Ningkamang ang opensa sa Celtics hangtod nga nakaduol sila pagbalik, 78-81, sa nahabiling 5:53 minutos.

Gitubag kini ni Brogdon og three-point shot aron inaton ang labaw sa Bucks ngadto sa 84-78 sa nahabiling 5:23 minutos ug gikan niadto, wala na molingi pagbalik ang Bucks. “This is what you work for. Embrace that moment. Go out as a team, attack it together ...

find a way to get a win,” asoy ni Bucks coach Joe Prunty.

Si coach Celtics coach Brad Stevens gianugnan nga wala nila naprotektahan ang ilang naposte’g labaw sa sayong bahin, butang nga kinahanglan nilang tutokan sa Game 7. “We got stagnant and we weren’t very good,” batbat ni Stevens.

Sa sayo pa, si Antetokounmpo mipasalig nang daan nga ipagawas niya ang tanan niyang makaya aron ilikay ang Bucks sa bangag sa panamilit.

“It’s big. We’ve grown as a team,” matod ni Antetokounmpo. “For us to win Game 6 -- we have a big opportunity ahead of us.”

Ang Celtics gipangulohan ni Jasyon Tatum pinaagi sa 22 puntos samtang nidugang og 18 puntos si Terry Rozier.

Ang Celtics kinahanglang mohimo og adjustment aron pag-alkontra sa bintaha sa Bucks sa gitas-on ug gipaspason. Ningdominar ang Bucks sa rebounding, 48-39.

“Clearly their speed and length and athleticism affected us,” dugang ni Stevens.

“They were quicker to the ball all night than us, best probably exemplified by the rebounding numbers.”

/ AP ■ NAGBANGIS. Bangis nga nakaduwa kagahapon si Milwaukee Bucks Giannis Antetokounmpo human niya giyahi ang Milwaukee Bucks ngadto sa 97-86 nga kadaugan sa Game 6 sa NBA basketball first-round Eastern Conference playoff series batok sa Boston Celtics...