Bantayan na

Nalipay si Lapu-Lapu City Mayor Paz Radaza kay sa miaging tuig, number one diay ang iyang siyudad sa natad sa turismo sa tibuok rehiyon 7. Ingon sa iya pa ganing gilupig ang Boracay sa padaghanay. Hayan mosamot na karon nga sirhan ang Boracay sud sa pipila ka mga buwan. Apan di angay nga mokompyansa si Radaza sa mao nga numero tungod kay mahimo kining maapektuhan kon pasagdan lang ang mga establisemento sa dakbayan sa paglabay sa ilang mga hugaw.

Makadisturbo ang gibutyag sa pipila ka mga lumolupyo nga nagpuyo sa mga baybayon nga di lang kay sila ang basulon, kon di ang uban usab nga mga establisemento nga way panaganang naglabay sa ilang waste water ngadto sa dagat.

Wa usab tingali magtumo-tumo ang mao nga mga lumolupyo. Mas maayong susihon kini sa Siyudad ug korihian gilayon kon makompirmar aron di kini makaapekto sa kadagatan sa umaabot.

Usa sa mga nakadani sa mga turista sa dakbayan sa Lapu-Lapu mao ang iyang kadagatan nga gidagsaan sa daghang adunahang mga turista nga maka-afford kaayo sa dagkong resorts.

Sud gud sa nanglabay nga katuigan, paspas ang kalamboan sa mao nga dakbayan. Gawas sa resorts, paspas usab nga mitubo ang real estate business. Mga edipisyo maora kapaspas sa mga uhong nga nakaturok.

Mao ni ang angay nga bantayan sa Dakbayan. Kinahanglan nga ilang tinud-on ang pagbantay nga tumanon sa tanang mga establisemento ug residente ang pagtuman sa environmental laws.

Kay kon piyungpiyungan lang kini sa kagamhanan, basin ulahi na ang tanan unyag kahigmata. Samtang sayo pa, himoan na nilag lakang.

Ang taho sa Department of Environment and Natural Resources (DENR), bisan tuod giingong di sakto pagkasuwat sa us aka mantalaan, angay nang pagabantayan. Di huwaton nga matinuod.