DEMAND SA MARIJUANA MISAKA, SHABU MIUBOS

Nitaas ang demand karon sa marijuana gumikan kay nikunhod ang supply sa shabu sa unang duha ka

quarter karong tuiga, sumala sa usa ka opisyal sa Philippine Drug Enforcement Agency (PDEA) sa Central Visayas.

Si Leia Albiar, tigpamaba sa PDEA 7, nibutyag nga ang pag-us-os sa supply sa shabu resulta sa makanunayon ug sagunson nga mga operasyon sa mga law enforcement unit.

Tungod niini, ang mga adikadik, matod niya, nangita og laing alternatibo nga magamit ug usa na niini ang marijuana. Bisan nikunhod ang supply sa shabu, sumala pa, taas gihapon ang demand niini.

Si Albiar nitug-an nga higpit ang ilang koordinasyon tali sa Armed Forces of the Philippines (AFP) kay kasagaran sa plantasyon sa marijuana naa nahimutang sa kabukiran.

Sa presentasyon sa PDEA 7 atol sa katapusang tigom sa Regional Peace and Order Council (RPOC) 7 karong buwana, gikan sa Enero hangtod sa Marso 2018 niabot og 1,334 ang mga operasyon batok sa gidili nga drugas diin 1,763 ang nangasikop.

Sa maong operasyon, niabot og 7,309.894 ka gramos sa shabu ang nasakmit samtang 541.7605 ka gramos sa pinauga nga marijuana ug 4,916 ka mga tanom sa marijuana ang nalarot.

Atol sa ikaduhang quarter nga tigom sa Local Government Unit Anti-Drug Abuse Council Partners Conference niadtong Biyernes, si P/Sr. Insp. Maria Teresa Tan, deputy chief operations sa Cebu Provincial Police Office (CPPO), nikompirmar sa marijuana plantation sa bukirang mga barangay sa mga siyudad sa Sugbo ug Danao ug mga lungsod sa Balamban, Dalaguete ug Badian.