Laing 2 patay sa aksidente

Usa ang patay ug walo ang nangaangol human nagkabangga ang traysikol ug motorsiklo kagahapon sa kaadlawon sa national highway sa Barangay Matabang, dakbayan sa Toledo.

Si Florencio Mahinay, 53, minyo, taga Talavera, Toledo gideklarar nga dead-on-arrival sa tambalanan.

Ang naangol nga pasahero mao sila si Ronalyn Cabonita, 19; Ranjie Cabonita, 8; Xiane Cabonita, 4; Wendell Just, 20; pulos taga Matabang; ug Emerlinda Mahinay, 46, tagaTalavera.

Lakip sa naangol ang drayber sa traysikol nga si Ramil Cabonita, 33, ug drayber sa gikabanggang motorsiklo nga si Christian Barcelo, 21, taga Luray 2, Toledo ug angkas nga si Nono Rosuerto, 25.

Si PO2 Richard Oberez sa Toledo Police station, niingon nga tungod sa kakusog sa impact sa pagkabanga, nangaangol tanang pasahero ug walay suwerte si Florencio Mahinay nga nagrabihan.

Niadtong Sabado sa ala 1:00 sa hapon, dihang patay ang 9-anyos nga si John Clark Sapini human siya maligsi sa usa ka sakyanan nga gimaneho ni Engr. Gino Manuel Perez sa national highway sa Barangay, Daanlungsod, lungsod sa Alcoy.

Naligsan kini human kini milabang sa dalan.

Nadala ni Perez sa tambalanan ang bata apan nakabsan gihapon kini sa kinabuhi.

Pasado alas 4:00 sa hapon sa susamang adlaw dihang ang van-for-fire nga gimaneho ni Junrey Barafon, 32, nabangga ngadto sa usa ka minibus nga gimaneho usab ni Aurio Lavador, 58, sa Barangay Macaas, Catmon.