Kongreso maoy mahukmanon sa pagwagtang sa RTWPB: Villamor

Taas nga opisyal sa Department of Labor and Employment sa Central Visayas niawhag sa mga pundok sa mga mamumuo ug militanteng grupo nga adto moduol sa Kongreso kon gusto nila nga ipabungkag ang Regional Tripartite Wages and Productivity Board (RTWPB).

Si Atty. Alvin Villamor, regional director sa Dole 7, nipadayag nga ang RTWPB naporma tungod sa balaod hinungdan balaod ra usab ang makapapas niini.

“If they want it abolish, then they should go through the legislation hindi yong rally,” sumala sa direktor sa press conference sa miaging semana.

Apan dali niyang gipamahayag nga gitahod nila ang mga rally nga gipasiugdahan sa mga militanteng pundok diin usa sa gipanawagan ang pagbungkag sa RTWPB.

Si Jaime Paglinawan, chairman sa Alyansa sa mga Mamumuo sa Sugbo-Kilusang Mayo Uno (AMA-Sugbo-KMU) ug chairman sa Bayan Central Visayas, unang nipasangil sa mga sakop sa RTWPB nga nipabor sa management o mga negosyante sa paghatag og umento sa suhulan sa mga mamumuo.

Siya unang nitumbok nga ubos lang ang aprobahan nga usbaw sa sweldo sa mga trabahante sa RTWPB ug wa magtan-aw sa tinuoray nga kahimtang sa labor sector.

Ugmang adlawa, sa kasaulogan sa adlaw sa pamuo, mopahigayon og lihok protesta ang mga pundok sa mga mamumuo aron ipadayag ang ilang sentimento ug yangongo sa ilang kahimtang sa pagpanarbaho, panawagan alang sa pagtapos sa end-of-contract o “endo” ug pagpangayo og umento sa suhulan.