Tuburan nangayo og dugang kapulisan

Nangayo og dugang pulis ang kapulisan sa lungsod sa Tuburan agi og pagpangandam sa barangay ug Sangguniang Kabataan elections human gikonsiderar sa Commission on Elections ug Philippine National Police isip election watchlist area (EWA).

Si Supt. Melbert Glade Esguerra, hepe sa Tuburan Police Station, niingon nga gawas sa iyang hangyo nga dugang mga pulis, mismo ang ilang kadagkuan sa Police Regional Office (PRO) 7 ang mohimo niini aron maseguro nga hapsay ug malinawon ang umaabot piniliay.

Siya nibutyag nga sa matag polling center, kinahanglan nga adunay tag duha ka mga pulis nga magbantay.

Siya niangkon nga sa kasamtangan kuwang ang iyang mga sakop kay moabot sa 49 ka polling centers ang ubos sa ilang area of responsibility.

Si Esguerra mobisita usab sa duha ka barangay sa lungsod nga dunay nahitabo nga kagubot sa miaging eleksyon.

Siya nanghinaot nga tinudon ug tumanon sa mga kandidato sa barangay ug SK elections ang ilang saad alang sa malinawon, ligdong ug hapsay nga piniliay sa Mayo 14 base sa ilang gipirmahan nga peace covenant niadtong Biyernes nga gipasiugdahan sa Comelec ug PNP.

“Ipakita ninyo nga kaya ninyo i-police ang inyong mga supporters, motabang nga ma-peaceful ang elections,” awhag ni Esguerra sa mga kandidato sa barangay ug SK elections sa Tuburan.

Gawas sa briefing sa Comelec ug pagpirma sa peace covenant, ang mga kandidato gihatagan usab og espirituhanong paglamdag sa parish priest ug pastor sa lungsod niadtong Biyernes diin nihimo usab sila sa gitawag og unity dance.

Niadtong Abril 9, di mominos 32 ka tag-as ug mugbo ng mga armas ang gipangtahan sa mga opisyal sa kabarangayan sa kapulisan aron pagpakita nga tinguha nila ang malinawong piniliay.