‘Validated list' lang: awhag sa CPADAO sa PDEA

Malaumon ang Cebu Provincial Anti-Drug Abuse Office (CPADAO) nga “validated’ ug dunay igong basehanan ang listahan nga gitakda unyang ipagawas sa Philippine Drug Enforcement Agency (PDEA) 7, nga nagtinir sa pangalan sa mga opisyal sa barangay nga giingong nalambigit sa ilegal nga drugas.

Matod ni CPADAO Executive Director Ivy Meca, kinahnaglang 100% usab kini nga sigurado sa mga pangalan ug identity sa mga tawo nga malakip niini.

Una nang gikataho nga dunay 211 ka mga pangalan nga naa sa narco list ni Pres. Rodrigo Duterte, nga maoy gikatakda usab nga ipublikar sa PDEA karong adlawa.

Nunot sa daghang mga spekulasyon labot sa legalidad ug tumong sa pag-publikar niini, gipadayag ni Meca nga angayang magkinto na gyud unta dili lang ang mga barangay officials kundi ang tanan nga anaa mag-serbisyo sa gobiyerno.

Hugot ang pagtuo ni Meca nga makahatag og bati nga imahe sa mga opisyal sa gobiyerno kon maduhig ang ilang pangalan sa illegal nga drugas.

Sa laing bahin, gawas sa una nang 35 ka mga barangay nga gitakda nang ideklarar nga drug-cleared sa oversight committee sa PDEA7, posibleng mapun-an pa unya kini ug dugang 35.

Kini human nga gisugdan na sa PDEA ug sa CPADAO ug sa ilang mga partner agency ang on-site validation sa maong mga dapit.

Ipaubos sa validation ang 18 ka mga barangay sa Tabogon, 7 sa Oslob, 5 sa San Francisco, 1 sa siyudad sa Naga ug 4 sa Samboan.