Kaluwasan sa kadalanan
Makapaalarma ang mga duguong panghitabo sa kadalanan sa habagatan sa Sugbo sulod lang ning semanaha. Dunay mga biktima gikan naglingawlingaw sa beach ning hataas nga bakasyon sa summer apan nahimong masulub-on tungod sa wala damha nga pagkakalas sa pipila ka kinabuhi.
Kagahapon, duha ang natala nga namatay sa aksidente sa dalan sa dakbayan sa Toledo ug walo ang angol. Laing usa ang namatay sa lungsod sa Alcoy ug lungsod sa Catmon sa amihanan.
Niadtong Biyernes sa gabii, usa ang patay dihang nabanggaan ang muticab sa Isuzu nga trak sa Barangay Ilaya sa lungsod sa Dumanjug, apan unang nahitabo sa Barangay Kanyuko sa samang lungsod diin nikabat og unom ang patay (upat dihadiha ug duha sa ospital) ug dulan sa napulo ang samdan dihang multicab nibangga sa trak.
Dili ba makapaalama, siyam ka kinabuhi ang nakalas sa aksidente sa kadalanan sa sulod lang sa usa ka semana? Unsa ang hinungdan? Naniid na ba niini ang Land Transportation Office (LTO)? Basin nakatutok lang sila sa pagpanakop ug pagpahamtang og dagkong multa tungod naa dinhi ang kuwarta? Nasulod sa mandato sa LTO ang road worthiness and safety.
Sa pagkakaron, ang publiko nagtagnatagna lang sa hinungdan sa aksidente. Usa ang klaro, seguro tungod sa hubog o tiguwang na nga drayber sa multicab nga gisakyan gikan sa nangaligo sa Sayaw beach sa Barili, silingang lungsod sa Dumanjug. Ang ubang kaso wala kita masayod, posible sa subra kakusog sa pagpadagan, walay igong pasidaan sa dalan o mismo ang daut nga dalan.
Apan ang dakong bahin sa paglikay sa disgrasya o kaluwasan sa dalan nagsugod kanato, labi na sa mga drayber nga magmatngon kanunay sa pagpamaneho sa sakyanan, diin dunay igong pahuway ug nakatutok sa dalan aron pagseguro sa kaluwasan sa daghang kinabuhi nga iyang sakay. Atong hagit sa LTO sa pagsubay sa mga kaso sa kadalanan aron kahimoan og basihanan, makuhaan of leksiyon ug tukmang rekomendasyon.