Negosyo ug trabaho
Dugay nakong kasuwaton aning ginagmay’ng patigayon sa uban natong mamumu-o nga naningkamot nga mokita ug extra samtang nga sila nagtrabaho.
Pananglitan sa among opisina dunay nagpautang ug lumpia, soriso, itlog ug daghan pa.
Wa pa ni labot sa imong gipangandoy nga rubber shoes ug ubang burloloy nga himalitan sab kaayo labi na sa mga batan-on.
Siguro nakasugat namo niining termino nga two gives, four gives ug mas labaw niini diha sa inyong dapit o trabahoan.
Sa subli natong pagsaulog sa adlaw sa pamuo ugma, usa sa gusto nakong isugyot mao ang suporta sa mga kompaniya sa ilang mga empleyado nga nag-sideline ug negosyo.
Ang suporta mahimong ipaagi ug pahuwam para ipuno sa pohunan.
Kahigayonan nga maka supply sa canteen ug ubang kalihukan sa kompaniya sama sa panginahanglan pagkaon ug mainom.
Lugar sa kompaniya nga mahimong kahijyaran sa mga produkto sa oras nga wa na’y trabaho.
Kining tanan mag-agi ug evaluation gikan sa kadagkuan pagsukod sa katakus sa empleyado pagsud ug ginagma’yng patigayon nga di maapektuhan ang trabaho.
Pananglit sa kompaniya nga dunay 50 ngadto sa 100 ka empleyado, sayon ra kaayong hutdon ang 40 kilos nga litson nga ipautang ka usa sa usa ka semana.
Aron di bug-at ang pagpaningil, ang management mohatag ug instruction sa tig-andam sa payroll pag deduct gikan sa iyang kubrahunon sa bayranan sa litson.
Kahibalo ko nga kiini nga sugyot ginagmay ra. Kung ang mga makinaadmanon sa negosyo mopalawom pa ning ideyaha, sigurado ko nga daghan ang makapahimulos.
BAR EXAMS
Ang nakalabay nga resulta sa Bar Examinition maisip nga talagsaon sab. Gikan sa naandan nga pag-ila sa top ten karon niabot na ug top 20.
Matod sa akong higala nga bar passer sab sa niaging tuig nga si Manlalaban Thads Bentulan nagsulat siya sa Supreme Court duha ka tuig na ang nakalabay.
Sa maong sulat iyang gipabuhagay ang iyang gibati labot sa paglimit lang sa mga gi-recognize nga topnotcher kutob sa top ten.
Nganong di man himoong 20 ka buok ang topnotcher nga kanang ika 11 hangtod sa ika 20 nipakita man gihapon ug maayonh labok.
Duna’y gustong ipuno para sa sunod nga bar si higalang Raffy Herrera ang News Director kaniadto.
Niingon si Raffy mas nindot sab nga ilhon kadtong bar examinee nga naka kuha nga pinaka taas nga rating o score sa matag subject.
Pananglitan sa subject nga Mercantile law.
Bisan kung wa masud sa top 20 ang examinee apan taas siya ug grado angayan lang siya nga pasidunggan isip topnotcher sa subject nga Mercantile law ug sa ubang subject.
Matod ni Raffy nga duna ma’y examinee nga manghawod sa usa ka subject apan di apil sa top 20. O apil sa top 20 ug nanghawod pa gyud sa lain laing subject.
Dako gihapong dungog sa usa ka examinee nga ilhon nga topnotcher sa subject nga Criminal Law bisan kung wa maapil sa top 20 sa bar exams.