I know in my heart

Usa ka Domingo, tungod kay summer, nagkasabot mi si Monsour nga mag-beach. Apan kanang dunay swimming pool. Unsaon man gud, init ang dagat ug makapaso sa panit.

“Manghapas lang gyud tag lotion, Sandra, aron pagseguro nga di ta magka-sunburn. Bisan swimming pool ang atong kaligoan pero init man ghapon ni.”

“Pero mas bentaha na lang kay tubig man ni, di parehas sa tubig dagat nga gawas nga init, parat pa gyud.”

Nanuroy mi niadtong tungora sa Plaza Independencia. Mao pay paggawas namo sa eskuwelahan. Ug kay hapon pa man, wa una mi mamauli sa tagsa-tgsa namo ka balay.

“Dad-on nato sila si Donna ug Lemuel, Sandra.”

Mitando ko. Gusto ko sab nga ikauban sila si Donna. Nindot man sab kon daghan ming mangaligo sa swimming pool kay alegre.

Gikontak ko si Donna sa selpon. Misugot si Donna. Siya na lang kuno ang mopahibawo kang Lemuel sa among pagpangaligo sa swimming pool. Apan may namatikdan ko kang Donna, Morg wa siyay kadasig.

“May sab nang makarelaks sab tag panagsa, Don.”

Anang pagka Domingo, gihapit namo ni Monsour sila si Donna ug Lemuel sa lugar nga among gikasabotan. Nagdalag awto si Monsour, sakyanan sa iyang uyoan nga nakaasawa og dato. Sa luyong bahin sa awto nanglingkod sila si Donna ug Lemuel. Usahay makatinan-away mi si Monsour kay parehas mig gihunahuna. Nahibulong man gud mi kay way tingug-tingog sila si Lemuel ug Donna.

Pag-abot namo sa beach resort sa Cordova, nag-abang dayon mig open cottage. Gipahimutang namo ni Donna ang dala namong bawon nga puso, mga sud-an, drinks ug mga binotelyang mineral water. Unya giagda nako si Donna nga mag-ilis mi og para kaligo sa dressing room. Way tingug-tingog si Donna nga mitando. Mao sab si Lemuel, way tingug-tingog.

Miambak dayon mi si Monsour sa swimming pool.

“Nag-away gyud nang duha, Sandra.”

“Bitaw, Mon. Klaro kaayo. Wa silay tingganay.”

Sa amo nang pagpaniudto, wa nako makita si Lemuel. Miuna diay kini sa pagpauli.

“Gibuwagan nako siya ron. Playboy man diay ang kanahan. Daghan diay ming girls sa iyang kinabuhi.”

Naghilak si Donna nga migakos nako. Nagkatinan-away mi si Monsour. Sa hilom, nakaingon ko nga wa gyud ko masayop sa pagpili kang Monsour. (KATAPUSAN)