Ang iyang nabana
Usa ka semana na lang sa dili pa ang kasal ni Sarah sa simbahan sa Birhen sa Regla sa Poblacion, Dakbayan sa Lapu-Lapu. Daw iya nang pagahilantawan ang iyang pagpaso sa hawanan sa simbahan paingon sa altar diin nag-atang ang iyang pamanhunon nga nag-alagad sa usa ka barko. Gradwado si Noel sa Bachelor of Science in Marine Transportation (BSMT). Magbiyahean ang cargo vessel nga gisakyan niini sa ubang kanasuran. Samtang si Sarah naa magtrabaho sa usa ka dakong hotel sa Lapu-Lapu.
Kompleto na ang mga kinahanglanon sa ilang kasal. Naka-seminar na sila sa family planning ug sa mga pagtulon-an sa simbahan. Pareho silang naa na sa legal age kay si Sarah 25 na man ug si Noel 30 na. Gikahimamat ug gikaila sa dalaga ang ulitawo atol sa iyang pagtambong sa birthday party sa iyang amigang si Alma kansang kapikas nga si Lito kauban ni Noel sa trabaho. Kadto ang sinugdanan sa ilang panagsuod nga misangpot sa pagsinabtanay.
Milanat og tulo ka tuig ang ilang relasyon bisag talagsa ra silang magkakita tungod sa matang sa panginabuhi sa iyang hinigugma. Apan sa maong gidugayon, wala gayud mosuway og hangyo si Noel sa iyang pagka babaye sa matag higayon sa ilang panag-uban. Tingali buot lang iyang pamanhunon nga ulay siyang dad-on sa altar sa kaminyuon. Dihang nahuman na ang gipatukod ni Noel nga balay sa Medalla Milagrosa Village, Barangay Gun-ob, iyang gihanggat si Sarah og kaminyuon.
NIANANG Sabado sa hapon gipahigayon ni Padre Ronaldo ang seremonyas sa kasal sa duha ka binuhat sa simbahan sa Birhen sa Regla sinaksihan sa mga dinapit ug mga kabanay. Lakip sa mga sponsor ang manedyer sa hotel nga gialagaran ni Sarah nga Dionel Mag-aso ug ang kapitan sa barangay nga si Jose Dungog.
Gikan sa simbahan, human sa picture-picture, namaingon ang tanan sa panimalay nila ni Sarah sa Gun-ob, diin didto himoa ang reception. .
Dihang namauli na ang mga bisita misantop sa hunahuna ni Sarah ang honeymoon nila ni Noel. Nagkasabot sila nga adto sa bagong balay ni Noel himoa ang seremonyas sa unang gabii sa ilang kasal. Pipila ka oras na lang ug maguhayguhay na ang iyang pagkabuwak!
Didto sa bag-o nilang salag nakailis nag sapot-pangkatulog si Sarah human sa kadiyot nga pag-shower. Nipis kaayo ang iyang gisul-ob diin nagpanikad kadtong duha ka bungtod sa iyang dughan. Mao ray gitabonan kadtong nag-ugbon sa iyang atuban- gan. Sila rang duha ni Noel sa kuwarto niadtong tungora. Wala gyuy makatugaw bisan unsay ilang pagabuhaton. Apan natingala siya kay ang iyang bana dugay kaayong migawas sa banyo.
“Honey, kadugay ba nimo diha? Nag-unsa ka pa man?” ni Sarah pa sa tumang kaparaygon. “Dali na, uy!”
“Kadali lang, Hon, kay hapit na…”
Apan napalaw si Sarah kay wala gayud tanduga ni Noel ang iyang pagka babaye niadtong higayuna. Pagka human og kaligo nag-ilis lang dayon kinig pangkatulog ug mihalok sa iyang aping, dayon mipaingon sa terasa nga nagbitbit og botelya sa bino uban sa usa ka kopita. Gipasagdan lang niya kini sa pagtuo nga magpainit lang kinig gamay sa dalunggan. Pero pagbalik niini midiretso lag higda nga morag walay nahitabo ug kadali rang nakatulog.
Sa misunod nga gabii mao lang gihapon ang nahitabo. Busa wa na makapugong si Sarah sa kaugalingon, gisukna niya si Noel, “Noel, nganong hangtod karon wa man gyud nimo hilabti ang akong pagka babaye? Naunsa man ka? Bakla ka ba? O wa ka mahigugma kanako?”
“Pa-Pasensiya na, Hon! Naglikay lang ko tungod sa gugma ko kanimo. Dili ko buot nga ang nahitabo kanako mahitabo usab kanimo. Aduna akoy sakit nga mananakod. Nakuha ko kini sa ubang nasod. Nagalgal ako sa akong mga kauban nga dukirok sa babaye. May HIV ako! Gililong ko kini kanimo kay dili ako buot nga mawala ka kanako.”
(KATAPUSAN)