DURANT, WARRIORS MITIPI SA PELICANS
Celtics mipalagpot sa Bucks; mosakbang sa Philly sa semis
Nipupo og 26 puntos ug 13 rebounds si Kevin Durant samtang nanghasol sa bisan asang suok sa korte si Draymond Green sa iyang pagmugna og triple-double aron agakon ang hosts Golden State Warriors sa dakong kadaugan batok sa New Orleans Pelicans, 123101, sa pagsugod sa ilang 2nd round series sa National Basketball Association (NBA) Playoffs kagahapon.
Si Green nagpakatap og 16 puntos, 15 rebounds ug 11 assists alang sa ikaupat niyang triple-double sa season unya nagpakapin pa siya og tulo ka steals ug duha ka blockshots aron tabangan ang defending champions nga makontrolar ang duwa.
Kuyaw sab nga nakaduwa alang sa Warriors mao si Klay Thompson, kinsa nimugna og 27 puntos.
Bisan padayon silang ningkombati nga wala ang ilang sinaligang pointguard nga si Stephen Curry, ang Warriors yano ra gihapong ningmakmak sa team nga ningbutlog sa Portland TrailBlazers, 4-0, sa 1st round series.
Nadominar og sugod sa Warriors ang engkuwentro dihang nakapauwan sila og 41 puntos sa 2nd quarter.
Ang duha ka sunodsunod nga three-point shots ni Thompson nakapaburot sa labaw sa Warriors ngadto sa 76-48 sa hinapos nga bahin sa 2nd quarter.
Human niini, ang Warriors wala na molingi pagbalik hangtod na sa katapusang gutlo.
Ang Pelicans gipangulohan ni Anthony Davis pinaagi sa iyang 21 puntos ug 10 rebounds.
Sa pagpadayon sa series, gilaumang makasugat pa’g mas malisod nga pagsuway ang Pelicans kay giingong mobalik na og duwa si Curry, kinsa naangol gikan pa niadtong Marso 23.
Ning duwaa, nipadayag si Curry nga andam na unta siyang moduwa apan wala pa siya tugti ni coach Steve Kerr.
“Just made the decision based on giving him the extra few days and the fact he only scrimmaged yesterday,” pasabot ni Kerr.
“You’ve been out five weeks and we’re playing in the playoffs, I don’t think one scrimmage is enough, even though he feels great, he wants to play and pleaded his case. But we’re going to sit him tonight and very likely he’ll play Game 2.”
CELTICS 112, BUCK 96
Nakaabante sa 2nd round ang hosts Boston Celtics pinaagi sa pagpalagpot sa Mil- waukee Bucks sa deciding Game 7 sa ilang kaugalingong 1st round series.
Nipupo og 26 puntos matag usa sila si Al Horford ug Terry Rozier aron pangulohan ang kadaugan samtang nidugang og 20 puntos si Jayson Tatum.
Ang Bucks, nga nagtinguha untang makataak sa 2nd round sa ikaduha pa lang higayon, gipangulohan ni Khris Middleton pinaagi sa iyang 32 puntos, nihatag og 23 puntos si Eric Bledsoe samtang niamot og 22 puntos si Giannis Antetokoumnpo.
Sa 2nd round o Eastern Conference semi-finals, ang Celtics makigbatok sa nagkakuyaw nga Philadelphia 76ers, nga ningtaktak sa Miami Heat sa 1st round, 4-1.