PETISYON NI OSMEÑA GIBASURA SA KORTE SUPREMA

Gibasura sa Supreme Court (SC) ang petition for review on certiorari nga gisang-at ni Mayor Tomas Osmeña batok sa decision sa Writ of Kalikasan nga giisyu sa Court of Appeals (CA) batok sa Inayawan dumpsite niadtong 2016.

Sa hukom sa SC niadtong Marso 20 nga gimando ni Associate Justice Noel Tijam ug giaprobahan ni acting Chief Justice Antonio Carpio uban sa 12 ka associate justices, gidasunan ang hukom sa CA.

“The petition is denied,” tipik sa kamanduan sa labing taas nga hukmanan human niapelar ang Cebu City Government pinaagi ni Osmeña sa Writ of Kalikasan sa CA niadtong Disyembre 15, 2016 ug ang resolution niadtong Marso 14, 2017.

Gihimug-atan sa SC ang nakaplagan sa Department of Health (DOH) nga nilapas na sa iyang duration nga pito ka tuig ang landfill kay gigamit na kini sud sa 17 ka mga tuig.

Naghulga kini sa supply sa tubig ug mga namuyo sa duol.

Nakaplagan usab sa Environmental Management Bureau (EMB) nga di maayo ang kalidad sa hangin ug naghulga sa tubig.

Matod sa Korte nga ilang giila ang kalisod sa administrasyong Osmeña sa pagpangitag kalabayan sa 600 toneladas nga basura kada adlaw, apan di usab nila masalikway ang hulga sa landfill sa panglawas sa katawhan.

Ang kamanduan sa CA ubos sa paningkamot ni Konsehal Joel Garganera, kanhi chairman sa committee on environment sa Konseho.