P50M SA MALASAKIT FUND

Binuwan na ang paghatag sa buhatan ni Presidente Rodrigo Duterte og P50 milyones nga tabang pinansiyal sa Malasakit Center sa Vicente Sotto Memorial Medical Center (VSMMC), siyudad sa Sugbo.

Si Special Assistant to the President Christopher “Bong” Go nisaad niini kagahapon human personal nga gitunol ang tseke nga nagkantidad og P50 milyones alang sa Malasakit Center ngadto kang VSMMC chief Dr. Gerardo Aquino uban si Presidential Assistant for the Visayas Michael Dino ug DOH 7 Director Jaime Bernadas sa programa sa Waterfront Cebu City Hotel & Casino.

Matod ni Go, ang tseke nga gi-turn over mao ang gisaad ni Presidente Duterte dihang namulong kini sa paglusad sa Malasakit Center sa VSMMC niadtong Pebrero ning tuiga.

Ang presidente nisaad og P50 milyones matag buwan nga dugang tabang pinansiyal alang sa mga benepisyaryo sa Malasakit Center, nga usa ka one-stop shop sa lainlaing mga buhatan sa gobiyerno.

“Ang kaning kwartaha ni para gyud nis Pilipino...So, duol lang mo diha sa hospital. Dili lang gyud siya kaagwanta nga makit-an ang iyahang igsuon nga dili makapatambal tungod sa kalisod,” ni Go pa.

Matod ni Dino dili na kinahanglan ang mga pulitiko aron moindurso og mga benepisyaryo sa Malasakit Center. Si Pierre Jabagat, coordinator sa Malasakit Center, nipahibawo nga niabot na og 10,944 ang nakadawat og hinabang pinansiyal sukad niadtong Pebrero ug P55 milyones na ang nahatag nga hinabang sa nanginahanglang mga pasyente sama sa alang sa dialysis, chemotherapy ug operasyon.

/ ALAN TANCAWAN FINANCIAL ASSISTANCE: Si Christopher Go (ikaduha gikan sa tuo), special assistant sa Presidente, nga misaad og binuwang P50 milyones nga financial aid sa Malasakit Center atol sa ilang pagbisita dinhi sa Sugbo kagahapon uban ni Presidente Rodrigo...