140,000 ka trabaho: DOLE

Niabot ngadto sa 140,000 ka mga trabaho ang gitanyag sa kapin 1,000 ka kompaniya sa tibuok nasod ug libuan niini ang napahimuslan atol sa local ug overseas jobs fair atol sa Labor Day kagahapon.

Si Under Secretary Jacinto Paras sa Department of Labor and Employment (Dole) nagkanayon nga 80,000 niini para sa gawas sa nasod ug ang laing 60,000 ka local nga trabaho.

Matod ni Paras nga kon dili makuha ang maong mga trabaho subli kini nilang itanyag sa mga jobs fair nga ipahigayon sa ubang suok sa nasod hilabi na ang trabaho sa overseas.

Atol sa Adlaw sa mga Mamumuo, ang Dole 7 nitanyag og dul-an 18,000 ka mga trabaho diin gatusan ra ang na hired on the spots samtang ang uban ipaubos pa og dugang interview.

Iyang gipahibawo nga sagad sa gipangita sa overseas mao ang mga skilled worker sama sa panday, mason, machine operator, welder ug daghan pang uban diin sila gikinahanglan didto sa nasod.

Nanginahanglan usab og mga nurse ang nasod sa Great Britain ug ubang mga nasod sa Europe, ug nanginahanglan og mga magtutudlo ang nasod sa China, dugang ni Paras.

Iyang giklaro nga dili mopadala og mga Overseas Filipino Workers ang Pilipinas ngadto sa mga nasod nga walay bilateral agreement sanglit ang ilang gitan-aw mao ang kaluwasan sa ilang gitawag og bag-ong bayani.

KUWAIT ISYU

Gipadayag ni Paras nga ang 80,000 ka mga trabaho sa abroad wala gitagana para sa mga OFW sa Kuwait nga giawhag ni President Rodrigo Duterte nga manguli.

Matod pa niya nga sagad kanila mga domestic helper ug kon ganahan sila mo-apply, kinahanglan pa silang mo-eskwela ubos sa Technical Education Skills and Development Authority (Tesda) para sila mo-qualify sa maong trabaho.

Matod ni Paras, kon adunay mga maestra kanila, mahimo usab silang mo-apply para mahimong magtutudlo didto sa China.

Samtang sa dakbayan sa Lapu-Lapu, gihugpaan sa libo-an ka mga nangita og trabaho ang Hoopsdome, Barangay Gun-ob niadtong bisperas sa kasaulogan sa Labor Day.

Si Rachelle Roma, Public Employment Service Office (PESO) Lapu-Lapu nipahibawao nga adunay 16,000 ka job vacancies ang gitanyag sa mga aplikante.

Gipahibawo ni Roma nga adunay 51 ka mga local companies samtang 10 ka Overseas license recruitment agency ang mi-apil sa maong jobs fair sa Lapu-Lapu City, sa Abril 29.

Nasayran nga sagad sa maong job vacancies naglakip sa Business Process Outsourcing (BPO), retail, services ug manufacturing.

Base sa talaan sa PESO Lapu-Lapu nga ubay-ubay ang nangapply alang sa panarbaho gawas sa nasud nga nangita og skilled workers.

Si Arlene Bonghanoy usa sa mga namasin nga madawat sa panarbaho abroad nagkanayon nga bisan pa man nga malayo siya sa iyang pamilya apan tungod sa pangihanglan gikinahanglan nga siya mosakripisyo.

“Nangita pud kog dako nga suweldo,”prangka nga tubag ni Bonghanoy.

Samtang si Juliet Sambrano nga duha na ka buwan nga na-stand by ang gisuwerte human siya gi-hire on the spot isip usa ka kahera sa inila nga clothing company.

Si Roma miawhag sa mga aplikante nga aron malikay sa illegal recruitment ilabi na niadtong buot mo-abroad nga sa jobs fair sila mo-apply ilabi na sa gipaluyohan sa Department of Labor and Employment ug Philippine Overseas and Employment Administration.