Mamumuo atimana
Dako ang papel sa mga mamumuo sa pagpatuyok sa ekonomiya sa nasod. Mag-unsa ang adunahang negosyante kon way motrabaho? Mahimong walay pulos ang ilang puhonan. Apan ang nakapait, mag-unsa ang mga mamumuo kon walay igong trabaho nga kasudlan, labina matag tuig liboan ang motapos sa kolehiyo apan nanag-ilog sa gamay nga opurtunidad sa trabaho sa nasod. Mao kini hinungdan nga daghang nanimpalad sa gawas, nahimo kabahin sa overseas Filino workers (OFWs).
Atol sa pagsaulog sa 116th Labor Day kagahapon, si Presidente Rodrigo Duterte niluwat sa makasaysayanong executive order bahin sa kontrobersiyal nga “endo” o end of contract nga praktis sa mga kompanya ug illegal contracting nga iyang gipirmahan sa wala siya magsugod sa iyang pakigpulong atubangan sa mga mamumuo sa dakbayan sa Sugbo. Sumala pa, ang bag-ong executive order gitumong sa pagpalig-on sa security of tenure sa mga trabahante.
Lisod matagbo ang katagbawan sa tali sa mga mamumuo ug mga tagdumala. Human sa pamahayag ni Duterte, nimugna kini og daghang reaksiyon. Ang mga walhong grupo nagmartsa-protesta sa Sugbo. Gamay lang sila apan banha sa pagpadayag sa ilang kawsa. Ang Employers Confederation of the Philippines (Ecop) niingon nga walay mahimo human balaud na. Apan nipadayag sa kabalaka nga daghang mosira nga negosyo nga daan nang apektado sa Tax Reformation for Acceleration and Inclusion (Train) law.
“We have to live with it,” matod ni Ecop president Donald Dee nga gikutlo sa GMA News Online.
Ang bag-ong executive order gitumong sa kaayuhan sa tanan apan dili kini perpekto sa katagbawan sa duha ka habig sa produksiyon. Apan maayong lakang sa paghunong na sa pag-abuso sa “endo” sa pipila ka kompaniya. Timan-i, ang mga mamumuo mahimong mopalambo o mobangkaruta sa imong negosyo. Atimana sila.