Nindot kon dunay disiplina sa prensa

Ang nakanindot sa Cebu kay dunay gitawag og press council nga maoy “magdumala” sa mga kalihokan sa mga sakop sa prensa.

Nindot paminawon nga bisan sa gitawag og kompetensiya sa pagpadagan sa ilang tagsa-tagsa ka mga “negosyo,” nagpabilin ang pagpakita sa kooperasyon sa mga miyembro alang sa kaugmaran sa makiangayon og responsable nga pamalita.

Dinhi masukod ang gitawag og “level of professionalism” sa mga sakop sa prensa sa Cebu.

Sa ubang mga probinsiya, wala pa matukod ang gitawag og Press Council kay dili pa mosugot ang mga sakop sa prensa sa maong lugar nga maghiusa ug ipadaplin ang tagsa-tagsa ka mga garbo alang sa kalamboan sa grupo.

Buyno, dunay mga grupogrupo apan kining maong mga grupo walay gahom sa pagdisiplina sa ilang mga sakop.

Kasagaran nga mahitabo, dunay piniliay, dayon pagasundan sa oath-taking diin ang giimbitar nga opisyal o politiko maoy pangayoan og “donation” nga maoy gamiton sa bayronon sa maong kalihokan.

Mahimo sab nga ang imbitahon usa ka dakong negosyante, nga sama sa politiko pangayoan gihapon og “donation.”

Human sa oath-taking, wala na. O kaha, panagsa na lang magkita kay og magkita magpasabot man kini nga dunay gastohon. Tungod sa kagamay sa ilang kita, bug-at kaayo sa mga sakop sa prensa ang pag-abuno og kantidad alang sa ilang regular nga kalihokan.

Lisod sab kon dunay gastohon unya “mangi-ulawon” ang lider sa maong grupo kay dili siya kaduol sa mga politiko og mamarayeg og “donation.”

Kon dunay moreklamo batok sa kalihokan sa usa ka miembro, walay mahimo ang maong grupo sanglit inutil ug walay gahom sa pagdisiplina kini.

Ang mahimo lang niini, mopagawas og “statement of condemnation,” og mao ra.

Dili gyod mapitol ang kalihokan sa usa ka yabag nga miembro.

Importante kaayo ang Press Council sanglit mao man kini ang magsilbi nga “police” sa mga sakop sa prensa tungod kay dili ikalimod nga kon dunay buotan, duna sab mga badlongon o abusado.

Usa na niini ang gitawag og AC/DC o wala ug tuo nga dawat sa bayad sa atake og depensa.

Gawas nga imoral kini, giduwa-duwaan lang usab ang katawhan kay gi-negosyo na man ang usa ka isyo.

Malikayan o kaha, manenos-menosan ang mga kalihokan sa mga abusado kon dunay “police” sa prensa.

Nganong naghisgot man kita og kalihokan sa mga sakop sa prensa?

Naghisgot kita niini human nato madawat ang balita nga dunay mga sakop sa prensa nga empleyado sab diay sa kapitolyo o nagdawatan og sweldo sa kapitolyo kada bulan. Unsa may ilang trabaho? Ang ilang trabaho mao ang pagpunay og atake o batikos sa mga tawo o grupo nga ilang gitan-aw nga mga oposisyon, apil na kadtong mga tawo nga mipadayag sa pagsupak sa mga gihimo sa mga opisyal sa kapitolyo.

Kadtong wala moangay, tawgon na dayon nila og oposisyon ug atakehon na dayon.

Gani, dunay mga atake nga di makao’g iro, tungod sa kabastos og kalaw-ay niini.

Mahimo diay kini sa empleyado sa gobierno nga nagdawat og sweldo gikan sa katawhan?