Di magkasinabot

Dear Papa Joe,

Tawga lang kog Marites, 30 anyos, taga Bohol. Ang akong problema mao ang akong bana ug akong mama nga dili gyud magkasinabot.

Sa bag-o pa ming minyo sa akong bana, nitipon mi sa akong mga ginikanan, pero wala dangtig tuig, gipalayas mi sa akong mama kay nagkatinubagay man sila sa akong bana sa gamay lang kaayong rason.

Dihang naglain na mi, pait kaayo ang among kahimtang labina gyud og magkasakit-sakit ang among anak. Nangayo mig tabang sa akong mama para pa hospital sa akong anak, pero wala gyud ni motabang bisag usa ka dako. Tig-a gyud kaayog balatian ang akong mama. Maong nakadesisyon ko nga di na gyud mobalik sa amo bisag unsa pay mahitabo. Pero nagkasakit ang akong mama ug gibatig kog kaluoy, konsensiya ug kahadlok nga anytime pwede ning mawa ning kalibutana.

Gusto nakong bisitahon si Mama pero dili naman gyud mosugot akong bana. Pareho silang mga taas og garbo. Unsa kahay angay nakong buhaton?

MARITES Marites,

Huna-hunaa nga bisag unsay mahitabo, ang imong inahan ang gipatas-an mo sa garbo. Kanus-a man ka pakita, kon gisud nag kahon imong mama? I’m sure, dili nimo mapasaylo ang imong kaugalingon kon simbako moabot nang higayuna. Maong samtang sayop pa, pasabta og taman ang imong bana, pag heart to heart talk mo. Bisag ikaw lang sa ang magpakita sa imong mama okay na, ayaw lang sa dad-a ang imong bana.

Pangayog pasaylo, at the same time i-convince ang imong inahan nga magpinasayloay na lang mo hangtud nga ang imong bana. Time is gold, and life is precious para inyong ipatigbabaw ang garbo. Dili baya gyud maayo ang magpuyo nga duna kay kaaway. Walay peace of mind and heart. Maong dapat makig reconcile ka na sa imong mama samtang sayo pa.

PAPA JOE