Beautiful liar
Sus, kalit nga naguba ang akong adlaw. Malipayon man unta kong migawas sa akong klasrom sa katapusan kong subject karong hapona, apan tungod kang Noel nga nagtindog sa main lobby ug nagtan-aw nako, misurok ang akong dugo sa kalagot. Nagtingsi pa ang karaho.
Kamabugal-bugalon gyung tawhana! Nagyawyaw kong mipadayon paglakaw. Gisulingahan ko siya dihang diha na ko sa iyang duol.
“Hi! Beautiful liar.”
“Way batasan!” Gisinggitan ko si Noel.
Kahilakon kong migawas sa gate sa eskuwelahan. Dihang molabang na unta ko sa pikas dalan diin adto ko mag-atang og dyip depasaheroan para sa akong pagpauli, gikuptan ang akong kamot. Paglingi ko pa, si Noel diay ang diha sa akong tapad. Kalit kong gibunlot ang akong kamot nga iyang gikuptan. Nawala gyud ko sa akong kaugalingon kay mao na lay akong namatngonan nga gitamparos ko siya. “Bastos!” Nagpanudlo ko sa akong tudlo sa nawong ni Noel. Mitulo gyud ang akong mga luha sa kalagot.
“Kawa’a nimoy batasan, uy, Noel! Mora ka mag wa makatunob og eskuwelahan!”
Dali kong gibiyaan si Noel nga nagpanghikap sa iyang aping nga naigo sa akong pagsagpa.
“Mirisi!” Mao kini ang katapusan kong gisinggit ngadto niya.
Morag nahuwasan ko sa kasuko kay nakabawos ko kang Noel. Namuwa gud ang iyang aping kay nakusog ko man gyud ang pagsagpa niya. Nakasakay dayon kog dyip. Di pa man unta ko modiretso sa pagpauli kay may palton pa ko sa usa ka Mall nga diha sa duol. Apan tungod kang Noel, wa na lang ko mopadayon sa akong plano.
Human kog panihapon, mosulod na unta ko sa akong kuwarto kay magtuon ko sa akong leksiyon. Apan may nanuktok. Wa ko na lang huwata ang among katabang nga maoy moabli sa pultahan sa sala, ako na ang nagsusi kon kinsay nahiabot. Basig sila si Mama ug Papa kay wa pa man sila sa among balay niadtong tungora.
Nakugang ko sa pag-abli ko na sa pultahan. Si Rodel ang nagtindog sa gawas sa pultahan. Nakapanghupaw ko kay midaut gyud siya. Namiyahok ang duha niya ka mga aping, ug nagkalkag ang buhok. Bulingon sab ang pamiste. Kining tanan nagpakita lang nga wa na atimana ni Rodel ang iyang kaugalingon.
Naluoy ko sa akong ex-boyfriend. (SUMPAYAN)