Training camp ni Manny opisyal na nga gisugdan

Opisyal nang gisugdan ni Manny Pacquiao ang iyang training camp sa Wild Card Gym sa General Santos City sa miaging adlaw alang sa iyang pagsuway og ilog sa korona ni World Boxing Association (WBA) welterweight champion Lucas Matthysse karong Hulyo 15 sa Axiata Arena sa Kuala Lumpur, Malaysia.

Sa wala pa siya nakighimamat og balik sa iyang dugay nang mga higala ug trainers nga sila si Buboy Fernandez ug Raides “Nonoy” Neri, ang Pambansang Kamao sa Pilipinas hinayhinay nang nagpasingot daan sa miaging semana.

Ning awaya, nakadesisyon si Pacquiao nga isalig nila ni Fernandez ug Neri ang iyang training ug wala niya gikuha ang bantugang si Freddie Roach.

“I am excited to return to the ring once again and face a dangerous champion in a difficult and challenging fight,” matod ni Pacquiao sa interbyu sa www.philboxing.com.

“I am inspired as I am also excited to face the champion.”

Ang 8-division world champion nasayod nga usa ka lehitimong knockout puncher si Matthysse hinungdan nga iya kining giisip nga delikadong kontra alang kaniya.

Si Matthysse, 35, naggunit og 39-4, 36KOs nga rekord samtang si Pacquiao, 39, naghupot og 59-7-2, 38KOs nga baraha.

Gipahimuslan sa fighting senator ang bakasyon sa senado nga magsugod karong Mayo 14 hangtod Hunyo 1 alang sa unang tipik sa iyang training camp.

Karong Hunyo, mas pahugtan na’g maayo ni Pacquiao ang iyang pagbansaybansay.

Ang panagharong nila ni Pacquiao ug Matthysse maoy labing dakong boxing event sa Malaysia gikan niadtong nagsumbagay sila si Muhammad Ali ug Joe Bugner, 43 na ka mga tuig ang nakalabay.