76ERS MIBAHAR BATOK CELTICS
Gipatak-om sa sumosulbong nga mga batos sa hosts Boston Celtics ang ilang kaparang sa Philadelphia 76ers aron irehistro ang 117-101 nga kadaugan sa pagsugod sa ilang Eastern Conference semi-finals series sa National Basketball Association (NBA) Playoffs kagahapon.
Si Terry Rozier, kinsa maoy mihulip sa nabakanteng luna ni All-Star pointguard Kyrie Irving, nagpakatap og 29 puntos aron pangulohan ang kadaugan samtang nidugang og iyang career-high nga 28 puntos si Jayson Tatum.
“My confidence is everything. My teammates believe in me, my coaches believe in me, so you know I just want to keep it
going,” asoy ni Rozier. Sa maayong gipakita sa 76ers gikan pa sa hinapos nga bahin sa regular season, ang ilang batan-ong mga lider nga sila si Ben Simmons ug Joel Embiid ang mihimo og grabeng langas apan wala dili ning kombatiha. “It’s been a dream come true. I want to keep going,” matod ni
Rozier.
Si Embiid nagpakatap og 31 puntos ug 13 rebounds alang sa 76ers samtang nidugang og 18 puntos si Simmons apan wala kini mosaler sa kabangis nga gipakita sa kinatibuk-ang puwersa sa Celtics.
Ang beteranong si Al Horford nitampo og 26 puntos alang sa Celtics samtang niamot og 11 puntos si Marcus Morris.
Unom ka mga adlaw human nila gidispatsar ang Miami Heat, 4-1, ang 76ers daw natay-an dayon sa ilang opensa hinungdan nga naangkon nila ang ikaduha pa lang nilang kapildihan gikan niadtong Marso 13. “We’re NBA players and we have to be ready. We weren’t ready tonight,” asoy ni Embiid. Si Rozier sayong nanginit ug nakamugna dayon kini’g 10 puntos ug unom ka assists sa 1st quarter pa lang.
“It’s been great to see Jayson and Terry and just our guys play like that,” matod ni Horford.
“I think that Jayson’s starting to figure it out . ... And it’s great to see for our team.”
Gikan sa 33-33 nga panagtabla sa tungatungang bahin sa 2nd
quarter, ang Celtics nakapasutoy og 10-0 run aron kontrolahon og sugod ang kombati.
Nagpadayon ang pagsutoy sa opensa sa Celtics hangtod nga nakaposte sila og 87-70 nga labaw sa hinapos nga bahin sa 3rd quarter.
Ning-aksyon paggukod ang 76ers ug ilang napahakan ang labaw sa Celtics apan didto ra kutob ang ilang pagpanghulga.
Ang Game 2 ipahigayon karong Biyernes sa balwarte gihapon sa Celtics.
Nanghinaot ang Celtics nga makabalik na’g duwa ning higayuna ang usa sa ilang mga sinaligan nga si Jaylen Brown, kinsa naangol (hamstring) sa 1st round series diin gipalagpot sa Celtics ang Milwaukee Bucks, 4-3.