Ginikanan sa quadruplets nagkinahanglan og tabang
“Kayanon gyud ni namo kay gihatag man ni sa Ginuo ang upat,” pahayag ni Kenneth Tongol, amahan sa quadruplets nga gihimugso sa Vicente Sotto Memorial Medical Center niadtong Abril 28.
Ang 33-anyos nga amahan nangayo og tabang sa publiko, Kagamhanan sa lalawigan sa Sugbo ug mga ahensiya sa kagamhanan alang sa iyang mga anak.
Matod ni Tongol, sa pagkakaron ang labing gikinahanglan sa iyang mga anak kay gatas ug diapers.
“More milk kay maoy kinahanglan sa mga bata para maka-recover sila. Kay kulang sa isa ka adlaw ang mahatag nga gatas sa ilang mother,” dugang sa amahan sa quadruplets.
Ang mga bata, duha ka babaye ug duha ka lalake, naa pa sa Neonatal Intensive Care Unit (NICU) sa VSMMC, diin duha niini ang naa sa incubator samtang ang laing duha kay naa sa warmer.
Unang nigawas si Baby Kendro sa alas 11:25 sa buntag niadtong Abril 28, nga maoy labing gaan og timbang sa upat ka magsuon. Siya nitimbang lang og .92 ka kilo.
Pagka alas 11:36 sa buntag, si Kenshie nisunod, 1.14 ka kilo ang timbang.
Samtang nagsunod sila si Izabelle, 1.16 ka kilo ang timbang, ug Izeah, usa ka kilo ang timbang.
Tungod kay kapin pa lang sila sa unom ka buwan, dili bug-at ang ilang timbang ug nanginahanglan og igong gatas.
NIadtong Pebrero, dihang unang nahibaw-an sa managpuyo nga quadruplets diay ang gisabak ni Rodriguez.
Gawas sa upat, aduna pa sila’y 2 anyos nga anak, si Jumelah.
Si Konsehal Emie “Em-Em” Carcellar, chairman sa committee on health sa Sangguniang Bayan sa Poro, isla sa Camotes, niingon nga dako na kaayo og ikatabang ang mga breast milk nga gikan sa ubang mga inahan nga gi-frozen.
“Ang mother karon is medyo niwang-niwang siya, so upat gud kabuok magtabang. So, dako kaayo og help ang outside assistance. Aside pud sa assistance nga atong madawat gikan pud diri sa DSWD, Capitol.. kay this case tagsa ra kaayo ning quadruplets,” dugang sa konsehal, ang usa sa mga nitabang ni Irene Rodriguez, inahan sa quadruplets, kinsa lumad nga taga Barangay Western Poblacion, Poro, Camotes.
Kagahapon, nidangop sila kang Gobernador Hilario Davide III ug nangayo og tabang.
Ang gobernador nitahas sa Provincial Social Welfare and Development Office (PSWDO) nga susihon kon unsa pa mahatag nga tabang sa quadruplets.
Si Tongol nidugang nga bisan kon kuwang sa timbang ug buwan ang mga bata, wa kini gihambin nga sakit sa kasamtangan.
“As a father, amo jung padakon og tarong para makaeskwela sila, makahuman sila,” dugang ni Tongol kinsa nagpaabot og tawag sa mga kompaniya diin siya nag-apply og trabaho. /