PRO 7 MILAHUGAY SA KAPULISAN

Milahugay na ang Police Regional Office (PRO) 7 og mga personnel sugod kagahapon nga adunay mga kabanay nga magpapili atol sa Barangay ug Sangguniang Kabataan (SK) election sa Mayo 14 diin kasamtangan sila nga ibalhin sa laing police station samtang nagsingabot ang piniliay.

Adunay 267 ka mga police personnel sa tibuok rehiyon ang gimandoan nga ibalhin sa laing police station.

Matod ni P/CInsp. Reslyn Abella, Deputy Information Officer sa PRO7, nga temporaryo lang ang gihimong lahugay sa kapulisan ug ibalik ra usab ni sa ilang naandan nga police station human sa eleksyon.

Sa Cebu City Police Office adunay 33 ka mga pulis ang ibalhin, sa dakbayan sa Lapu-lapu adunay duha, sa Mandaue moabot sa upat ka pulis, sa probinsya sa Sugbo adunay 64, 10 sa lalawigan sa Siquijor samtang 43 sa Negros Oriental ug ang labing daghang maapektohan ang Bohol Provincial Police Office nga adunay 111 ka pulis.

“Ang general directive man gyud sa atung regional director is para sa police personnel nga mag remain impartial mao gani ang purpose nga kadtong naay relatives running for position this coming barabngay and sk election is I reshuffle sila I reassigned to other units para intact and impartiality,” matod ni Abella.

Giisa na usab sa kapulisan ang full alert status sugod gahapong adlawa tungod sa pagsugod na sa campaign period diin tanang police wa na tugoti nga maka-leave sa ilang trabaho.

Hugot nga monitoring ang gihimo karon sa mga police station sa ilang tagsa-tagsa ka hurisdiksyon nga adunay mga kalihukan ang mga kandidato sa mga barangay nga sakop sa ilang estasyon.

Ang PRO7 nag-andam na usab og 100 ka mga police personnel nga idugang sa pwersa sa Cebu Provincial Police Office ug lalawigan sa Bohol tungod sa election watchlist areas.