Moabot 300 kandidato sa Lapu-Lapu City mipirma og commitment signing kagahapon
Moabot sa 300 ka mga kandidato sa Barangay ug Sangguniang Kabataan elections sa dakbayan sa Lapu-Lapu nagtinguha nga luwas ug limpyo nga piniliay karong Mayo 14 pinaagi sa pagsalmot sa Commitment Signing.
Ang kalihokan gipaluyohan sa City Police Office pinaagi ni P/Supt. Rommel Cabagnot ug city election officer sa Commission on Election (Comelec) nga si Atty. Ann Janette Chua-Ho Lamban sa pagpahigayon og “Bike & Run for Safe Election 2018” ug ang “Commitment Signing” nga gihimo sa atubangan sa Lapu-Lapu City Hall sa wa magsugod ang pagpangampanya sa mga kandidato.
Matod ni Lamban nga ang commitment signing usa ka panaad sa mga kandidato nga di mogamit og puwersa, pagpamalit og buto ug ubang matang sa pagpanikas alang sa kasigurohan sa ilang kadaugan.
“Panawagan ngadto sa kandidato… we need your pledge to the community that you will observe peaceful and fair, so that we will have a credible results of the election,” tipik sa pamahayag ni Lamban.
Si P03 Wilfredo Ybañez, Police Community Relation (PCR) sa LCPO nagkanayon nga ang Unity Bike and Walk gisalmutan sa PNP, Philippine Air Force, Philippine Navy, Comelec ug mga kandidato.
Moabot sa tres kilometros ang gilay-on sa lakaw samtang kadtong mga nagbisikleta adunay pito kilometros ang ilang gitadlas.
Sa laing bahin, gipahibawo ni Lamban nga way barangay sa Lapu-Lapu nga gihulagway nga “areas of concern” diin taas ang posibilidad nga motumaw ang kagubot samtang naghinangat o atol na sa adlaw sa piniliay.
“Duna lang tay ‘intense barangay’ but it doesn’t mean nga gubot. Alegre lang kay daghan ang (kandidato) nanagan,” pasabot sa opisyal.
Ang mga gihulagway nga “intense barangay” naglangkob sa Barangay Pusok, Pajo, Punta Engaño, Buaya, Calawisan, Canjulao ug Gun-ob.