Lalake naputlan og tiil dihang napiit sa suction pump, gitiwasan niyag putol sa kutsilyo

Empleyado sa usa ka water utility company nalandig sa hospital human maputol ang iyang tuong tiil nga napiit sa suction pump.

Matod sa biktima, Renato Peroso, nga iyang gihingpit pagputol ang iyang tiil gamit ang kutsilyo aron makalingkawas siya sa makina.

Sa wa pa mahitabo ang aksidente niadtong Lunes sa hapon, si Peroso nasugoan nga mag-overtime aron malimpiyohan ang water treatment area sa Cebu Manila Water Development, Inc. (CMWD) sa Barangay Luyang, lungsod sa Carmen.

Matod ni Peroso nga gisultihan siya nga ang kompanya adunay high-profile nga bisita.

Si Peroso misaysay nga wa siyay gisul-ob nga safety gear.

Samtang naglimpiyo siya, nadakin-as siya diin iyang tuong tiil nasulod sa suction pump.

Ang kaubang empleyado maoy nakapawong sa makina.

Nangayo og kutsilyo si Peroso aron iyang maputol ang tiil.

Dali siyang gidala sa pangpubliko nga tambalanan sa Danao City ug dayon gibalhin siya sa usa pribadong hospital sa dakbayan sa Sugbo.

Matod ni Peroso ang kompaniya misaad nga abagahon ang tanang bayranan sa hospital ug sa pagpalit sa mga tambal.

Midugang si Peroso nga nahadlok siya nga mawagtangan siya og trabaho kon mapagawas na siya sa ospital apan gipasaligan na siya sa iyang labaw nga di siya angayan mabalaka.

“Hinaot dili ko tangtangon,” matod ni Peroso nga way gibasol sa panghitabo sanglit usa lang kini ka aksidente.